Kashmir nung yimjung maliba agi India mabensar:Rajnath

Srinagar, August 25 (Agencies) : Brihostibarnü Union Home Minister Rajnath Singh-i kanga temulung shiranga Kashmir nung yimjung nüngdak ta ashi.
Pai, Kashmir nung yimjung maliba agi India langka agi mabensa amai kümogo. Anungji July 9, 2016 nü nung tang tashi nung nisung 70 tashi taküm laluba tensa tajungba küma azüoktsü atema party ajak nung züngsemtemi memenui state nung arua olemtep akatsü, ta ashi.
Kashmir ananü semdangba tatembangnü osangbenertem den jembiba mapang pai, jashia longkak aitertem nokdangtsü atema pellet gun amshiba melena anogo ishika tsüngda nung hadir tanga ka amshitsü, ta ashi.
Srinagar nung amongdang Home Minister-i, “Ni state nung party balala nungi lenirtem dena parnok nisung 300 shi den ajuyrutepa olemtep tajung kaogo,” ta ashi.
“Nisung ajaki yimjung tanaben aginer. Iba tensa yagi onok kanga mepelar. Nisung taküm samaba agi onok temulung ayanger,” ta Rajnath-i state Chief Minister Mehbooba Mufti anasa mener ashi.
Sorkar anemertemi Kashmir lanurtem tarutsü nükla tajung aliba den masayatsüla, ta pai olen ka nung shisem.
“Lanurtemi parnok tekapu nung long masü saka kaket, pen aser laptop tem amtsüla,” ta Paisa ashi.
Kashmir lanurtemji India tarutsü nükla lir. Anungji Kashmir nungeri mepet mesü adokdaktsüba nisungtem bendanga metettsü nüngdak, ta Rajnath-i ajungshi.