Kashmir Nunger Olajia Angadangtsüla

Joko hopta pongu dak tali Kashmir nung mobile phones aser internet nokdangba, tesem aika nung curfew ozüng aliba aser osangbenertema mapa sadema meinyakdaktsüba ya ajanga Kashmir nungeri India union den tepilaba akümtsüa akok ta bilemer. India temzüng nung Jammu & Kashmir nem maongka balala agütsüba Arrla 370 sorkari agienba aser state jenjang agienba sülen timtem agütsütsü südi ta melung melemi bilemertem aser yimtenren lenirtem aika pua ayu. Kasa onük nung longkak aiter lanur ka taoba hopta asüba sülen ketdangsertemi tangsabo tenokdangba magientsü atema telemtetba agiogo. Tang tasen tentetba Union Territory- Jammu region nung network communication lapoktsüogo aser Ladakh UT nungbo mepetmesü madoker ta osang angazüker. Kashmir nung mobile phones aser internet tang tashi nokdanger aser school tem tanaben lapokaka kaketshirtem longsoa school-i maoer. Ano külen Kashmir nung longkak aitba aser police-i tashi tali amshiba osangtem aika angazüker saka Centre sorkari item osangji tai ta ashir. India nunger yimtenren lenir aikati J&K nung Arrla 370 agienba ya pusemer, ajisüaka iba ken o ya tang judiciary-i reprangshidar. Kashmir nung Arrla 370 agienba sülen sorkari, joko Kashmir nung terenlok mapatem inyaktsü, mapa jenti adokdaktsütsü aser tetsürtem nem kasa temeden agütsütsü ta nangzükogo, ajisüaka itemji ajanga tajangzük angutsüpur nüburtem aser lenirtem tang tashi tebang nembanga yutsüba inyakyim yabo tera meshidak amai bilemer. Tsüngremi meimchir nem taküm alitsü asoshi temeden aika agüja ali nungji meimchir ka arishi piyong liyonga aodang tangar dang meyirutsüibo aseni melungba inyaktsü aser jembitsü meimchir dak temeden lir. Iba tangatetba nungji UN-i meimchir kati ka temeden anema meinyaktsü aser mezüngmeshi masütsü asoshi sangdonga küm shia ‘Human Rights’ anogo amonger. Akhidang British nungeri alima tesem aika aramoka parnok sünütsü asüba ajanga meimchir aika temeden makai taküm tipdema mali, ajisüaka tanübo item mapangji süiogo. Tang Kashmir nung sorkari Kashmir nunger pei lima nung pei kidang nungi mayazükdaktsüba aser ola madoktettsüsa inyakba yabo Kashmir nunger nem tim temeden magütsür amai bilemer. Tang Kashmir tensaji bilemdangra akhidang asen lima nung India sepaitemi Naga nunger pei lima tipdema alitsü temeden magütsüba aser yimdak pudena ayuba otsü ang imdangi arur. Anüng kübok meimchir ajak nem kasa temeden agüja liaka tang Kashmir nungerbo aika pei lima sadoka melitetba aser nümamedangteti aliba mapang ka lir. Atangji Kashmir atema Centre sorkar sentongbo tajung alitsüa akok, ajisüaka Kashmir atema telemtetba agiba nungji Kashmir nunger yimtenren lenirtem-a anioktsüla aser Kashmir nunger olajia angadangtsüla.