Kashmir onük jembiba ajanga tajung kecha madoktsü: Yasin Malik

Srinagar, December 09 (Agencies): Kashmir onük nung Ato kilonser Narendra Modi-i aniba sorkar tajemdakdak nung melung mesüi Bodhbar nü Jammu & Kashmir Liberation Front (JKLF) mendenbuba, Yasin Malik-i, India-Pakistan tsüngda ken o asentenshir jembibaji oda tenüng kati agitsüsa akumba ajanga lir, aser ibaji ajanga tajung kecha madoktsü, ta ashi.

“Anogoshia Jammu & Kashmir nüburtemi amokmeren ajurur. Yangi Muslim nunger timtemdar,” ta Malik-i ashi.

“Tia makatsü kaji, kodang lokti senden kadir injang sashia yokba ajangshir. Tamalen tesünep nung lungkak aiter kaketshirtem pua liasü aser tepouktaki yok. Parnokji tai maket kaketshirtem. Asüngdangyaba mapang parnok kibongtem danga mejungi benshiogo,” ta paisa ashi.

“Centre nung iba sorkar akumba anogo nungi parnoki onük tulu akumtsü meranger, koba ajanga ashishitepa rara adokdaktsür. Iba sorkar indang tenangzükbatem ajanga Kashmir onük mejembinüba sayur. Ni bilemer, Sushma Swaraj-i Pakistan Ato kilonser Nawaz Sharif aser Foreign Minister Sartaj Aziz den jembiba ajanga kecha tajangzük mangutsü aser Kashmir onük mebentettettsü,” ta pai ashi.

External Affairs Minister Sushma Swaraj tang Pakistan nung senden ka nung dendar, aser yashi lai Pakistan external affairs minister Sartaj Aziz ajuru aser tanü lai Ato kilonser Sharif ajuruogo.