Kashmir onük medenibo India den ken o mejembitsü: Pakistan

Islamabad, July 13 (Agencies): Hombar nü Pakistan-i, Kashmir onük mendenibo India den ken o kecha mejembitsü ta metetdaktsüogo.

National security & foreign affairs nung Pakistan Ato kilonser asoshi adviser Sartaj Aziz-i,”Kashmir onük mendenibo India den ken o kecha mejembitsü,” ta ashi.

Taoba hopta Russia, Ufa yimti nung Pakistan Ato kilonser Nawaz Sharif aser Ato kilonser Narendra Modi na senden amenba dak sendakba nung Aziz-i, “tensa süngjema akümtsü nung rangloker junga tenzükogo,” ta ashi.

Paisa, iba onük (Kashmir) tangatetba nung Pakistan akanga noktaka lir aser iba onük nungbo atsüanem kecha malitsü, ta metetdaktsütsü.

Mumbai amakba ken o nung tongti aibelensang LeT operations commander, Zaki-ur Rahman Lakhvi anema ken o akaba dak sentakba nung pai, iba ken o nung Pakistan-i India dang nungi osang aser kuli peria nüngdaker, ta ashi.

2008 Mumbai amakba ken o nung ken o junga mekatetba aser Pakistan sorkari nüngdakba kuli magütsüteter ta court-i shia Lakhvi chiokba ajanga India kanga mepelai lir.

Aziz-isa ashiba agi, Modi-Sharif senden nung Ato kilonser Sharif-i Modi dang Samjhauta bomb lendong indang kuli meshiogo.

Russia, Ufa nung Shanghai Cooperation Organisation (SCO) senden amenba mapang mapang ka apir Modi aser Sharif na ghionda ka jungnüa senden mena liasü, aser iba mapang nung Mumbai amakba ken o tekaraba nung tembangtsü asoshi linük anapronglai nüngdakba mera agitsü atema bangjema liasü.