Kashmir onük nung Pak-India tsüngda inyaktsü melunga lir: Iran

New Delhi/Islamabad, April 01 (Agencies): Kashmir onük latettsü atema India aser Pakistan na tsüngda inyaktsü asoshi asüngdangra onoki melunga lir, kechiyong linük ana tsüngda rara adokra ibaji ajanga tesem nung aliba linüktem rongsenkettsüng kongshitsü, ta Iran linüki metetdaktsü.
Iran Ambassador to Pakistan, Mehdi Honardoost-i, Kashmir onük nung Pakistan aser India na tesendaktep yanglutsütsü atema par linüki melunga lir, koba ajanga tesem nung yimjung bener arutsü, ta ashi.
Paisa, “Tesem nung tesünep aser yimjung teimla nung Iran sorkari nungita yaritsü melunga aliba sangdongogo,” ta ashi.
“Tesem nung linük tulu ka ama Iran-i iba ken o bentettsü atema merangdangtsü, saka linük anaprongla nungi onok dang iba atemaji mepishia mali,” ta pai ashi.
Pai ashiba agi, India aser Pakistan na tsüngda rara adokra ibaji ajanga linük ana rongsenkettsüng aser terenlok kongshiba dang masü saka tesem nung aliba tanga linüktema kongshitsü.
Tesem nung terenlok alitsü aser tesünep alitsü atema iba ama onük bentettsüji kanga tongtibang, ta pai ashi.
Osangbeneri asüngdangba ka langzüdang ambassador-i, kiralongra ya tang alima rangben tebilemtsü onük ka lir, ta ashi. “Iba ya (kiralongra) tesem ka mesüra linük ka nung dang masü saka ajaklen lir,” ta pai ashi.
Pakistan-Iran na tsüngda shishilembaba tesendaktep dak sendakba nung Honardoost-i, linük ana tsüngda Free Trade Agreement draft ka sign süogo aser ibaji kobi melii mapa küma inyaktsü, ta ashi.
China Pakistan Economic Corridor (CPEC) project dak sentakba nung tasüngdangba ka langzüdang pai, iba ya project kanga tulu ka lir aser iba ya ajanga Pakistan aser China linük na dang masü saka tesem nung aliba linük ajak nem maongka agutsütsü, ta ashi.
Paisa ashiba agi, iba project ajanga tesem nung temelenshi adokba dang masü saka tesem nung aliba linüktema longjemdaktsütsü.
Iran-i Saudi Arabia’er Islamic teloktep nung adentsü melunga ali asü? ta asüngdangba langzüdang Iran ketdangser, Honardoost-i, Iran-i iba teloktep nung denner ta tamalen sangdongogo, kechiyong Muslim linüktem nung ajangshiba tebilemtsü onüktemji ajak tangatettep nung bangjemer bentettsü nüngdak, ta ashi.