Kashmir onük ya Pak aser India nati dang latettsüla: Sushma

New Delhi, June 05 (Agencies): Ato kilonser, Narendra Modi-i aniba NDA sorkar küm asem ajungba nüngtem nung New Delhi nung ayongzükba osangbenertem senden ka nung jembidang External Affairs Minister, Sushma Swaraj-i, Pakistan-i Kashmir onük ya International Court of Justice (ICJ) nung benoktsü makok, iba onük ya linük anati dang bentettsüla, ta ashi.
India-i Pakistan den mangatettep onük ajakji ken o jembiba ajanga bentetner, ajisüaka kiralongra aser ken o jembiba na külemi aotsü makok, ta laisa ashi.
Pakistan den inyakyimba maparen nung sorkar tashimait kecha mali, ta lai ashi.
Astana nung SCO senden alidang Ato kilonser, Modi aser Pakistan Ato kilonser, Nawaz Sharif na ajurua senden amentsü, ta osang prokba dak sendakba nung lai, “Tang tashi nungbo linük anapronglai iba atemaji jembia mali,” ta ashi.
Paris climate tezüngüktep dak sendakba nung lai, “India-i senotsü nung merumeruba ajanga Paris agreement agi masü. Onoki alima kümzüka ayutsü atema inyaktsü aser iba atema India-i küm 5,000 tashi inyaka arudar,” ta ashi.
India aser US tesendaktep dak sendakba nung Union Minister-i, Donald Trump US Tir akümba sülen nungi India-US tesendaktep indar; Barack Obama Tir inyakdang linük ana tesendaktep ainba kasa jenjang nung indar, ta ashi.