Kashmir onükji India-Pak tsüngda bentettsüla: Theresa May

London/Delhi, October 27 (Agencies): British Ato kilonser, Theresa May-i, Kashmir onük nung UK-i tangatetba nungi matsüngshir, iba onük ya India aser Pakistan linük na tsüngda parnok sasa bentettsüla, ta ashi.
Yashi House of Commons nung Prime Minister’s Questions mapang Pakistan nung asoba Labour MP, Yasmin Qureshi-i, taruba ita Ato kilonser May-i India semdangba mapang Kashmir onük süoka jembitsü asü ta asüngdanga liasü.
Iba dak sentakba nung Parliament nung May-i, “Iba sorkar jakdang aser sorkar tashii aruba mapang nungi (Kashmir onük) tangatetba kasa nung dang lir, Kashmir onük ya India aser Pakistan nati parnok sasa bentettsüla,” ta ashi.
Iba o ya ajanga lai November 6-8 anogotem nung India semdanga Ato kilonser, Narendra Modi den senden amendang Kashmir onük süoka mejembitsü ta jangjar.
British Ato kilonser November 6 nü New Delhi tonga arutsü, aser ibaji la Ato kilonser akumba sülen Europe adener aliba linük ka mezüng semdanger asütsü.
Iba mapang nung lai Modi den külemi India-UK Tech Summit tenzüktsütsü aser pa den senden amentsü.
May den la meina UK nung small & medium enterprises nungi nübotem aser International Trade Minister, Liam Fox nunger arutsü.