Kashmir, Pulwama nung maneni longkak aiter ka asü, pezü yiru

Srinagar, July 22, 2016: Kashmir nung curfew ozüng benoka aliba mapang Hokolbarnü Srinagar, Natipora nung security sepaitemi gari lenmang mokdanga aliba noksa angur.

Srinagar, July 22 (Agencies): Hokolbarnü Kashmir Valley nung ‘Hokolbar sarasadem’ senshiba sülen tesem balala nung longkak aitertem aser security sepaitem tsüngda rara adoka nisung ka asü aser pezü yiruogo.
Tanü Pulwama, Awantipora kübok Chursoo nung sepaitem den raradang Mushtaq Ahmad kanga mejungi yiru aser hospital atongdangbo pa süadok.
Ano Kashmir Valley tesem balala nung longkak aiter nisung pezü tashi yiru, aser parnok rongnung Pulwama, Kakapora nungi asangur chanu ka tenüng agi, Asif Reshi bo kanga mejungi lir.
Kashmir Valley kübok district aika nung maneni curfew ozüng liaka Baramulla district aser Bandipore district na nunga rara adokba osang lir.
Anogo 12 tejaklen Ishfaq Ahmad yirua liasü aser pa yasüng, Brihostibar aonung hospital ka nung süogo.
Telungpur telok, Hizbul Mujahideen commander, Burhan Wani tepsetba sülen anogo ka lir July 9, 2016 nü Anantnag, Kokernag nung longkak aita rara adokdang Ahmad kanga mejungi yirua liasü.
Security sepaitemi telungpur lenir, Wani kahsetba sülen Kashmir nung longkak aita anogo aika raraa arudang tang tashi nung tajemba agi nisung 46 tashi süogo aser nisung 3400 dak tema yiruogo.