Kashmir rara nung nisung 5 asü

Srinagar, August 16 (Agencies): Tanüa Jammu & Kashmir nung rara adoka nisung pongu süogo, aser ibaji züngsemabo July 8 nü kiralongrar, Burhan Wani tepsetba sülen Kashmir rara nung asür ajak agi nisung 65 jungogo.
Iba dak sentakba nung tanü Delhi nung temaba jenjang nung senden ka mena liasü, aser iba senden nung Union Home Minister Rajnath Singh, National Security Adviser, Ajit Doval aser Director of Intelligence Bureau nungeri tensa asadang.
Tanü Budgam district kübok yim ka nung longkak aitertem aser sepai tsüngda rara adoka liasü. Police-i ashiba agi, longkak aitertemi Central Reserve Police Force indang gari nung long agi aonba sülen parnoki lokti pakshidaktsütsü atema injang akah, iba sülen rara adoka nisung pongu asü.
Yasünga Srinagar, Batamaloo tesem nung sepai aser longkak aitertem tsüngda raradang nisung ka asü.
Yashi Independence Day onük jembidang Jammu & Kashmir Chief Minister, Mehbooba Mufti-i Kashmir nung yimjung alitsü atema ayongzüka, ‘Prangpong masü saka ken o jembiba ajanga dang Kashmir nüburtem yaritsü,” ta jembia liasü.
Raraba anentsü ayongzüka Mufti-i, “Alima nung democracy tulutiba nung asenoki tebilemtsü mebentetra, asenoki kecha tesem nunga makoktsü. Atal Bihari Vajpayee (taoba Ato kilonser) mapang nung merenemi aliba maparenji Ato kilonser, Narendra Modi kübok renemtsü imlar,” ta ashi.
Kashmir nung kiralongrar telok tulubaji Hizbul Mujahideen lir, aser iba telok nung commander Wani tepsetba sülen Kashmir nung nüburtemi longkak aita sepaitem den raradang nisung jenti asüba den merirjang aika yiruogo.
Kashmir nung ano curfew ozüng hopta pongu atsülangogo.