Kashmir tesünep atema Modi-i ken o jembitsüla: Congress

New Delhi, August 17 (Agencies): Joko tesüiba ita ka dak tema Kashmir nung rara adokba aliba dak sentakba nung tanü Congress-i, Ato kilonser, Narendra Modi-i, Balochistan indang mejembidang tamasa Kashmir Valley tensa azüoka süngjemtsü atema ken o jembitsüla, ta ashi.
Pei linük nung lendong tulu alidang Ato kilonseri tanga onüktem jembir ta shia Congress lenir tain, Ghulam Nabi Azad-i, lisopurtem (Kashmir) den ken o jembia linük kümzüktsüla, ta ashi.
Congress headquarters nung osangbenertem den jembidang Rajya Sabha Opposition lenir, Azad-i, “Asen Ato kilonser ya International lir. (Bendang linüktem semdangba mapang) Pai yangi kechisa ataloker’ar ibajia metettsüla. Tensa kong mejungi lidir yangji pai rangloker inyaktsüla,” ta ashi.
Independence Day onük jembidang Modi-i Balochistan aser PoK onük süoka jembiba dak sentakba nung tasüngdangba ka langzüdang, Azad-i, Modi-i tanga onüktem mejembidang pai tamasa Kashmir Valley tensa azüoktsü atema jembitsüla, ta ashi.
“Tawa anogoshia nisung kar asür, iba nungji nübur mesüra sepai densema lir. Parnok ajakji asen nisung. Pai iba atema kecha mejembir,” ta ashi.
Taoba mapang Jammu & Kashmir Chief Minister,  Azad-isa, Modi-i Ato kilonser atema tenangzükba magidangyongi Pakistan den yimtenren mapa tenzüka Ato kilonser, Nawaz Sharif tushia agizük. Modi-i Pakistan nung kiyimba benjung ka nunga denogo, ta aitsü.
“Tawa tembangba tzüngluruwa mongpu senden nung pai Kashmir indang jembitsü maongka trokben nguogo, saka pai ola madoki liasü,” ta Azad-i ashi.
“Parliament nung iba (Kashmir) o lemtepbaji opposition-i rongshiba ajanga lir. Asen nüburtem den ken o jembitsüla,” ta Congress lenirisa ashi.
Maneni tasüngdangba ka langzüdang Azad-i, senior party lenir aser taoba Union Home Minister, P Chidambaram-i Congress, National Conference aser melungra PDP senteper Kashmir tebilemtsü atema jembitsü ta sangdongbaji pai memetet, ta ashi.