Kashmiri lanur 70 telungpur telok nung denogo

Jammu, August 13 (Agencies): Tesüiba ita tenet tsüngda Kashmiri lanur 70 telungpur telok balala nung denogo, aser parnok timbaka south Kashmir kübok district asem nungi lir, ta tanü ketdangsertem osang ka ajanga metetdaktsü.
Parnok timbaka Pulwama, Shopian aser Kulgam district tem nungi lir.
2016 küm nunga Kashmiri lanir 88 telungpur telok nung dena liasü.
2014 küm nungi tenzüka lanurtem telungpur telok nung adenba kanga timba akümer, ta kasa osang ajanga metetdaksü.
Kashmir nung 2015 küm nung lanur 66 aser 2014 küm lanur 53 telungpur telok balala nung aden, ta security agencies osang ajanga metetdaktsü.
Security ketdangsertemi ashiba agi, Pulwama ya telungpurtem tiyongtsü tesem ka kümogo aser Pulwama ya litsü sasep nung Srinagar, Anantnag, Kulgam, Shopian aser Budgam district tem sendaktepba tongtibang tesem ka lir. Item tesemtem nung sepaitem aiben maakogo.
Pulwama tesem nung süngjanglu jenti lir aser arem kanga temelem lir, aser ibai ajanga telungpurtem aser kiralongrartem kanga junga atsükteter aser sepaitem nungi jenbua senzüteter.
Pulwama ya taoba mapang Hizbul Mujahideen commander, asür Burhan Wani’er jila lir. Pa yaküm July ita nung security sepaitemi tepseta liasü.