Kaspersky Lab-i threat 100 dak tema putetogo

New Delhi, July 29 (Agencies) : Russia nung amenoka aliba software security company Kaspersky Lab-i, alima rangben nung bushisüngdangba sülen ‘malicious operations’ 100 dak temai linük 85 nung sorkar aser rongsenkettsüng inyakyim nung timtem adokdaktsütsü sentong aliba putetogo, ta sangdong ka ajanga metetdaktsü.
“Iba ama ‘malicious operations’ yanglua amshirtemi parnok inyakyim kanga terenlok lia inyaktsü tenzükogo aser ibaji ajanga lendong aser takoksa aika bener arutsütsü,” ta company sangdong ajangsa ashi.
Iba ama inyakyim tamajung purateta amshirtem ya mongin tesa aser sen nunga kanga takartem lir.
Kaspersky Lab nung bushisüngdangertemi tarutsü mapangtem nung cyber temi ajurutsü aliba lendongtem putetogo.
Item telok tamajung yagi nisung kar meyong, kanga dang nüngdakba miim osang kibur nem memetetdaktsüi agizüker sen yong ayoker.
Kaspersky-i ashiba agi, sorkar inyakyim, rongsen kettsüng tsütsü aser tapoktsü yangluba tesemtem iba ‘malicious operation’ agi meneptsü ana nung lir aser ibaji tebilemtsü tulu asütsü.
“Onoki küm trok tashi iba ama operation tamajung agi asenok amaktsü merangba kanga kümdanga tsüngsübua aruogo aser iba inyakyim yagi telok kar indang miim osang aser sen auyatsü merangba putetogo,” ta Kaspersky Lab nung Global Research & Analysis Team Director Costin Raiu-i ashi.
“Intelligence indang data kümzüka ayutsü atema security ayutsü kanga nüngdaka kümogo,” ta Raiu-i ashi.