KASU-i transformer tasen akhanger

Dimapur, July 22 (TYO) : Kiphire Area Students Union (KASU)-i jila nung hopta ka tsüngda tashi nungbo electricity yangluja light shitak yoktsü akhanger kechiba süra Transformer raksaba ajanga jila nung ita anabuba light mali tammang tia nung lir, ta KASU Tatong Tir Isaac L. Tsalumpi-i sangdong ka ajanga metetdaktsü.
Department den iba tebilemtsü aiben lemsatepaka parnoki tenarong marepzüba ajanga department dang mepelar, ta KASU-i ashi.
Raksar aliba melentsü atema bener arua aliba transformer jia yanglushi yonga joko majungtsü, ta KASU-i putetogo.
Department-i iba tebilemtsü shishia magiba ajanga bank, mozüki aser shishilembadak tesem aika nung tongtibang mapa meinyakteter. Anungji tekaraba nung transformer tasen ka bener arutsü akhanger aser atakzüka yutsüba mapang tashi nung bener marura KASU-i kechi tapet ibaji inyaktsü, ta sangdong ajangsa metetdaktsü.