Kate Winslet-i ajungshiba ajanga Leonardo DiCaprio Titanic nung shilem agi

New Delhi, February 12 (Agencies) : James Cameron-i yangluba Titanic film sayar joko küm 20 shi ajunger. Iba film ajanga Hollywood nung Leonardo DiCaprio aser Kate Winslet na kanga jangja meteta aküm.
Iba film ajanga Winslet aser DiCaprio na manger mesangwa tsüngda nüngtugu aküm.
Ajisüaka iba film nung shilem agitsü asoshi DiCaprio shibai ajungmeso-ar asenoki memeteti aruogo. Saka ashiba agi Kate Winslet-i ajungshiba ajanga DiCaprio-i Titanic film nung Jack Dawson shilem agi.
Deadline osangbenertem den interview agiba mapang, arishi küm 41 tain, actor DiCaprio-i, “Titanic film tu Kate Winslet kena atema tetendangba ka mesüka liasü. Kena pei pei film nung shilem agia liasü. Ni la actor ka ama meimer aser lai ‘Ana külemi iba film nung shilem agidi, ya anati akoktsü,’ ta ashi. Aser ashi ama kenati takok ngua shilem agiteta meimlaba takok angu,” ta ashi.
Kate aser Leo nati shilem agiba Titanic film ya cinema otsü rongnung tulutiba aküm aser telemsa 14 nung iba film Oscar asoshi tenüng benoka liasü. 1998 küm film ajanga Oscar award 11 angu.
Alima rangben nung Titanic ajanga sen dollar billion 2.18 aatet aser Leonardo DiCaprio aser Kate Winslet na alima nung aliba kibong ajak nung meteta aküm.
The Revenant film nung shilem agisang, DiCaprio-i, Titanic film ajanga takok anguba sülen pa taküm rangben melenshi, ta ashi.
Titanic ajanga Leonardo star ka ta jangja meteta aküm. Pa Titanic nung takok anguba ajanga pai shilem aginüba film tem nung mela mela maongka angu.
Leonardo DiCaprio aser Kate Winslet naprongla The Revenant aser Steve Jobs film nung shilem agiba atema taküm Oscar Awards asoshi tenüng benoka lir.
Winslet-i The Reader (2009) tarensen nung Oscar ka ngua lir ajisüaka Leonardo bo ano Osacar mongudang.