Kathmandu nung Sushma-i Nepal PM Sher Bahadur ajuru

Kathmandu/New Delhi, August 10 (Agencies): Brihostibarnü Nepal yimtiba, Kathmandu nung India external affairs minister, Sushma Swaraj-i Nepal Ato kilonser, Sher Bahadur Deuba ajuru; Taküm June ita nung Nepali Congress lenir, Bahadur Ato kilonser menden atema tenangzükba agiba sülen tang mezüng lenir ana ajurutepogo.
Iba dak sendakba nung tanü Indian external affairs ministry otongdar, Raveesh Kumar-i twitter ajanga, “#India aser Nepal na tesendaktep kanga junga lir aser linük anati amalitepa inyaker. EAM @SushmaSwaraj-i Nepal Ato kilonser Sher Bahadur Deuba ajuruogo,” ta metetdaktsü.
Tan ita, August 23 nü nungi tenzüka Nepal lenir, Deuba-i India semdangtsü lia tanü Sushma-i pa ajuruogo.
Hombarnü China Deputy Ato kilonser, Wang Yang-i Nepal ajurutsü sentong lir.
Arrtsülen India aser China na tensa mejungi aliba dak sendakba nung tawa Nepal deputy prime minister, Krishna Bahadur Mahara-i, tang China aser India na Doklam nung mepetmesü aliba onük nung Nepal-i shinga pu masemtsü, ta metetdakja liasü.
Foreign minister, Mahara-i, iba onük bentettsü atema Nepal-i India aser China na tsüngda ken o jembidaktsüner, ta ashi.
“Arrtsü onük nung Nepal-i shinga pu masemtsü,” ta tan hopta pai osangbenertem dang metetdaktsü.
Hokolbarnü Kathmandu nung 15buba ‘Bay of Bengal Initiative for Multi-Sectoral Technical and Economic Cooperation (Bimstec)’ Minister tem senden nung Sushma-i shilem agia adentsü.
Sushma-isa Nepal Tir, Bidhya Devi Bhandrai den opposition partyu lenir, KP Oli, Maoist lenir, Pushpa Kamal Dahal “Prachanda” aser Madhes nungi lenirtema ajurutsü sentong lir.