Kathmandu nung tayimtsü tsüoka nisung 50 süogo

Metsüremi 12, 2018 nü Bangladesh nungi aruba tayimtsü ka Kathmandu, Nepal nung aliba tayimtsü anendak tsükokba anasa Nepal nunger ketdangsertemi yaritepba mapang tangokba noksa nung angur.

Kathmandu, Metsüremi 12 (Agencies) : Bangladesh nunger tayimtsü koba nung passenger 67 den idakji inyaker par pezü mena liasü, iba tayimtsüji Nepali yimtiba, Kathmandu nung tayimtsü anendak bushia yimzüka aluba mapang tia maka tsüoka tajemba agi nisung 50 taküm samaogo, ta ketdangertemi osangka metetdaktsü.
US-Bangla Airlines ajanga reprangba tayimtsüji Dhaka yimti nungi aruba mapang tayimtsü anendak longbanga astü atsüa alidak tsüker mi aploka luagi tsüok, ta airport nung general manager tenüng agi Raj Kumar Chettri-i metetdaktsü.
Sepai otongdar, Gokul Bhandari-i ashiba agi, “Tang tashi nung onoki tasümang tenem ngutetogo.”
Mi aploka rongya alidak tayimtsü teraksa nung jagi nisung aika kümzükogo saka nisung tekubo kechi jenjang nung aliar mejangjateti liasü aser parnokjibo mezüngoker.
Tayimtsüji mi adoka Tribhuvan International Airport anasa moapu ka nung tsüok. Iba tesem temeket nung merepshia liasüba tasümangtemji aika kanga mejungi rongsar liasü ta tenük kuli purtemi metetdaktsü. Tayimtsü nung jagi mokozü melem-melema adokba nguogo.
Sepaitem aser tekümzükertem tesemji tonga oagi tayimtsü nung mi jangrua alibaji remsep.
Kasa osang ajanga ashiba agi, 1992 küma Bangkok nungi aruba Thai Airways tayimtsü ka Kathmandu nung anentsü merangba mapang tsüoka idakji mena alirtem ajak taküm samaogo.