Kathrada den asüpila sentong nung Jacob Zuma medendaktsü

Johannesburg, March 29 (Agencies) : Bodbarnü South African anti-apartheid activist Ahmed Kathrada den asüpila sentong agi saka iba sentong ya President Jacob Zuma anema agiba sentong ka mesüka aküm.
Ahmed Kathrada ya African National Congress (ANC) züngsem tongti ka aser Nelson Mandela den teyariteper tajung ka liasü. Mongulbarnü pa arishi küm 87 nung asü aser par kibongi President Zuma dang asüpila sentong nung madentsü atema metetdakja liasü.
Ajisüaka, tanü asüpila sentong nung vice president Cyril Ramaphosa, cabinet minister tem aser temesüng nisungtem anema nokdakba sülen Tir inyakertem ajak aden.
Hombarnü Zuma-i Finance Minister Pravin Gordhan bendanglen aliba meyipa arutsü tetuyuba agütsüba ajanga South Africa nung mepetmesü tuluka adok.
Tir Zuma-i pa den yariteper ka den Pravin indang mapa melenteptsü akok ta arentaka bilemba ajanga nübortemi ola adoka liasü.
Tanü asüpila sentong nung Kgalema Motlanthe-i ashiba agi, temesüng nisungtem anema mapa inyakba sülen tawa linük nung yimtenren mapa inyakba nung Kathrada-i temulung mesüi liasü aser pa kanga jashia liasü.
“Tang yimten yimsüsürtem dak pai temulung masü liasü aser linük nung Tir dang menden yujang ta ashitsü bilema liasü” ta Motlanthe-isa shisem.
1999 küm yimtenren mapa nungi anenba sülen Kathrada-i yimjak nung madoki liyong aru saka tawa pai ANC nung ochimashi anema aser tamakok angubatem atema ola adoka liasü.
Zuma-i aniba sorkari ochimashi inyaker, mapa shitak meinyaker aser South Africa nung tanak nisungtem atema mapa meinyaktsür ta Kathrada-i yimjak nung aija liasü.
1964 Rivonia ken o nung Kathrada ya Mandela den külemi tepuokdak ayu. Iba tatalokba ajanga alimai South Africa nung temesüng nisungtemi tashiyim agi yimsü asüba jungkai adoka liasü.
Kathrada ya küm 26 tashi tepuokdak ayu aser 1989 küm chioka liasü. South Africa nung mezüngbuba democratic inyakyim nung shimba sorkar nung pai President Nelson Mandela atema adviser inyaka liasü.
Kathrada asüba sülen Tir Zuma-i pa nem tetushi agüja linük wako tom nung ayutsü tetuyuba agütsü aser tanü cabinet senden ka amentsü aliba athi.