Kathua & Unnao ken o tem atema India ajungalen lungkak ait

New Delhi, Rongchii (April) 15 (Agencies): Kathua aser Unnao nung tebur teloktemi tashiyim agi shi nung medemba ken o atema atema tanü India ajungalen lungkak aitba sentong balala nung nisung aikati shilem agiogo.
Item tatalokba atema ‘Not In My Name’ tenüng nung lungkak aittsü atema tayongzükba ka agüja liasü.
Jammu & Kashmir kübok Kathua nung arishi küm 8 tain tetsür tanur ka dak tashiyim agi shi nung medemba sülen tepset. Iba tatalokba atema tanü tashi lar kibongi temeten mangu lir.
Uttar Pradesh kübok Unnao nunga BJP MLA Kuldeep Sengar-i tetsür ka dak tashiyim agi shi nung medem aser iba tetsürla tebuji tepuokdak lia asü.
Item tatalokba ya linük ajunglen nungi aitsür aser tanü tanga yimtitem dak alia Delhi, Mumbai, Bengaluru aser Trivandrum nung nisung noklang aikati lungkak aitba sentongtem nung shilem agi.
Lungkak aitertemi tekaratiba nung item ken o angadangtsü aser aibelenertem ozüng tesashi agi merenshitsü atema takhangba agütsür.
Amungnü “Not in My Name” banner aser “Protect us, Don’t hurt us” placards amer nisungtemi lungkak ait.
DELHI: Delhi nung agiba sentong nung Kathua ken o atema lawyer Deepika Rajawat dena shilem agi.
Nisung kari Deepika Rajawat dang iba ken o atema mejembitsü amokmerener aser iba atema lai asüng Supreme Court nung temepishiba ken o ka benoktsü. Iba ken o Jammu & Kashmir state nungi tangaleni belentsü atema lai mepishitsü.
Tanü sentong nung arishi küm 17 tain Akshita ta ser kaketshir ka tetsü den külemi aden aser lai ashiba agi, “Iba tatalokba ajanga asenok ajak aoksadaktsüogo saka ni tatalokba osang angashidang balaka maoksa, kechiyong asenok tetsürtemi mapang shia ibala inyaksangshi ajurur aser osangtem angashir.”
“Arishi küm 8 tain ka dak yamai inyakba atema yimten yimsüsürtemi temulung magütsüba angudang ni kanga jashir. Asenok ajak longjemer langka ka inyaktsüla” ta tanga kaketshir kati ashi.
MUMBAI: Mumbai kübok Carter Road nunga Kathua aser Unnao tatalokbatem anema ola madoki lungkak aitba sentong ka agi. Iba nung film nung shilem agirtem aden aser parnok rongnung Twinkle Khanna, Kalki Koechlin, Kiran Rao, Rajkumar Rao, Aditi Rao Hydari aser Vishal Dadlani nungertem liasü.
Actress tejen Helen-ia shilem agi aser lai, “Ni iba tanutsüla atema sarasademtsür” ta nüktzü alua ashi.
La film nung shilem agi tenzükba mapang nungi tang tashi nung linük nung temelenshi kar angu asü mangu ta osangbeneri asüngdangdang, “Iba linük ya tetsürtem atema tamajungtiba kümogo” ta Helen-i langzü.
Tanü agiba sentong nungsa Music Director, Vishal Dadlani aser actress Sameera Reddy natia aibelenertem ozüng tesashitiba agi merenshitsü atema takhangba agütsü.
TRIVANDRUM: Kerala kübok Trivandrum nunga lungkak aitba sentong agi aser idangji tsüraburtemi parnok tanurtem atema kanga shisabulua bilemer ta ashi.
Parnokisa ken o anaprong atema temeten agütsütsü takhangba agütsü.
BENGALURU: Bengaluru nunga Cooke town, Richards Park aser Benson Town tesemtem nung lungkak aitba sentongtem agi.