Katibenla Kichu indang Video CD tanabuba sayaogo

September 20, 2016 nü Care and Support Office, Mokokchung nung Katibenla Kichu indang Video CD Vol-II  sayadang agiba noksa ka angur.

Dimapur, September 20 (TYO) : 2015 küm “Best Creative Child with Disabilities” indang National Award aser 2016 küm “Art and Culture” indang Samarthya Award angur, Katibenla Kichu-i la indang tanabuba Video CD adokogo.
September 20, 2016 nü Care and Support Office nung DWO, Mokokchung, Bendangkokba-i Katibenla indang Video CD Vol-II sayatsü.
“Kentenbaji Tsüngremi sempet balaka agütsüba lir aser Katibenla’er tsüraburtemi la nungita yariba atema tenüngsang agütsür,” ta Bendangkokba-i ashi.
Iba sentong nung Care and Support Society, Mokokchung, Managing Director, Imchawati Kichu-i o tatsüka jembidang, pa kanga nüma atanger kechiyong Katibenla Kichu ya Village Disable People Organization (VDPO) Khensa nung züngsem ka aser iba ya CBR Forum Bengaluru ajanga teyari agüja Community Based Rehabilitation for Persons with Disabilities (CBR) ta ajaba C&SS-i ketdang asür, ta metetdaktsü.
Sentong nung Katibenla tebu Rongsennungba Kichu-ia o tatsüka jembidang, Tsüngrem taochi ajanga par jala nem sempet agütsü aser la yariba atema C&SS dang pelar, ta ashi.