Katiyar o ajanga BJP melungsentsü sayur: Priyanka

New Delhi, January 25 (Agencies): Bharatiya Janata Party (BJP) lenir, Vinay Katiyar-i tashishitsü o jembiba meyipja Bodhbarnü Priyanka Gandhi Vadra-i, Katiyar-i jembiba oji ajanga BJP melungsentsü sayur, ta aitsü.
Congress tongti, Sonia Gandhi’er jala, Priyanka-i, “Pa oji ajanga India nung nütsüng tesadangka (tetsürtem) atema BJP melungsentsü sayur,” ta ashi.
Iba denji kasa Congress lenir, Randeep Singh Surjewala-ia, Katiyar oji ajanga tetsürtem anema BJP melungsentsü sayur, ta ashi.
Osangbenertem den jembidang Surjewala-i, “Priyanka Gandhi Vadra anema BJP lenir Vinay Katiyar-i tashishitsü o jembibaji ajanga BJP lenirtem ajak melungsentsü sayur. Pai India tsür ajak mezüngmeshiogo. Kechiyong India tsürtemji parnok dak aketba sempet, tenlaba mapa aser sobaliba ajanga asadanger masü saka parnok tebor ajung nung ajemdaker asadanger ta südaktsür,” ta aitsü.
Ato kilonser, Narendra Modi aser BJP Tir, Amit Shah nati tatok meshitsüla ta takhangba agüja Surjewala-i, party-i Katiyar nem temerenshi tulu agütsütsüla, mesüra taruba election nung parnoki tamakok angutsü, ta ashi.
“Ato kilonser Narendra Modi aser BJP Tir Amit Shah nati tangsa tang tatok meshiba dang masü saka Vinay Katiyar ama shisamaka nisung nem temerenshi agütsütsüla, aji oda mesüra Uttar Pradesh aser India tsür ajaki election agitsü aliba state pongu nung BJP sendoktsü,” ta paisa ashi.
Tanep Katiyar-i osangbenertem dang, Priyanka ji nüboyimtsür rongnung tebor tajungtila masü, ta jembia liasü.
“Taruba assembly election nung Congress atema la nüboyimtsür asüyonga kecha masü. La dang tebor tajungtiba nüboyimtsür aika lir,” ta BJP leniri jembia liasü.