Kaziranga nung drone amshia shiruru senzüba asadangdar

Guwahati July 9 (Agencies): Assam nung Kaziranga National Park shilem 50 shi metsüngbangogo aser park nung shirurutem talisa tezü ka adenba güntok kümzüka ayutsü nükjidong nung park ketdangsertemi drone ana yokogo.
Drone Ana ya park nung shiruru senzüsenpongba tali tajungba asadangtsü asoshi yok aser shirurutem timba ka Karbi Anglong district leni odar, ta park director Satyendra Prasad Singh-i osangbenertem dang Deobarnü ashi.
“Drone ana yagi anüngleni feet 2,000 tashi yima tur pa meketa km pongu tashi nung noksa tangokteter, aser khen nung ghonda tesadang ka tashi yimzüteter. Park nung tzümetsünga aliba ajanga shirurutem senzüsenpongba asadanga parnok nem tekümzükba agütsütsü nükjidong nung onoki drone tem amshir,” ta pai ashi.
Singh-i ashiba agi, drone ana ya Golaghat district police administration tang nungi khen atema meshi.
“Tang tashi nung park shilem 50 tzü agi metsüngbangogo. Iba ya kanga tensa mejungrabo masü aser park nung shirurutem atema chiyongtsü anünga mali,” ta Prasad-i ashi.
Ajisüaka pai ashiba agi, shirurutem karbo Karbi Anglong tenem leni National Highway-37 ajanga ogo.
“Iba ya yimya ka lir. Kaziranga National Park nung tesem kar lir aser tzümetsüng aruba mapang shirurutem iba tesem yagi aoer. Ajisüaka shiti aser mesü tembo tzümetsüng aruba mapang Karbi Anglong leni aoer,” ta paisa ashi.
Küm shia tzümetsüng aruba ya park asoshi takoksabo masü. shirurutem iba ajanga mesüngjemteter saka tzümetsüng aruba ajanga nüngdak makaba süngtonglitong aser ai tem bener aoer koba park ‘ecosystem’ atema kanga tongtibang lir, ta bushisüngdangertemi ashir.
“Onoki National Highway-37 nung talisa aonung garitem kara kara mesenzütsü asoshi tenokdangba agütsüogo. Iba ajanga lenmang ajanga Karbi Anglong leni aoba shirurutem tsüktoktsü nungi kümzüktsü,” ta park director-i ashi.
“Gari senzütsüba speed limit ji 40km/hr lir aser iba nung manidakertem dang senchi sen 5000 achir,” ta Shingh-i ashi.