Kaziranga park nung kentok ka tepset

Jorhat, January 13 (Agencies) : Assam nung Kaziranga National Park nungi Mongulbarnü ozüng alema shiruru tepsetertemi kentok tetsü ka kahseter tezü bener ao.
Iba tatalokba ya Bagori forest range nung aliba Sitolmari anti-poaching camp anasa atalok.
Mongulbar anepdang shiruru tepsetertemji KNP nung Brahmaputra ayong yimoklen tsütsü nungi ait, ta park ketdangsertemi ashi.
“Onoki ayongküm anasa rong ana aleneter yua aliba angu. Shiruru tepsetertemji rong nungji aruba liasü. Tsüngnep aser tanga kulitem ajanga ngutetba agi shiruru tepsetertemji parnok nisung 5 liasü. Parnoki .303 rifle kati kentokji kahset” ta divisional forest officer (Kaziranga) S K Seal Sharma-i osangbener dang ashi.
2015 küm world heritage site Kaziranga National Park nung ozüng alema shikarirtemi kentok 17 tashi kahset. Yaküm December 23 aser 27 anogotem Bagori aser Burapahar forest range nung kentok ana kahseta liasü.

You must be logged in to post a comment Login