Kaziranga Summit: Nagaland & Assam tsüngda tesendaktep akangshitsü bangjem

Dimapur, October 17 (TYO) : Hombarnü Assam Chief Minister Sarbananda Sonowal aser Nagaland Chief Minister TR Zeliang na Kaziranga nung ajurutepa senden ka amen aser iba mapang kidanger state ana tsüngda tesentaktep akangshitsü atema bangzüngtep, ta Media Cell, Chief Minister’s Office, Nagaland-i sangdong ka nung metetdaktsü.
Sonowal aser Zeliang na ya school azüngdang nungi medemer lir. Tena Don Bosco School, Dibrugarh nung külemi azüng aser iba mapang tena tesayurji asür PA Sangma liasü, ta sangdong nungsa shia lir.
“Ken o adoka aliba teloktem ajurutepa tebilembatem lemsatepra aser ken o angatetteptsü atema temulung lemtetba lira, ajak akoktsü” ta Nagaland Chief Minister-i tanü senden nung ashi.
Mapang shia state ana tsüngda arrtsü dak sendakba ken o tem adoker aser iba onük ya okadaki oshidang agütsütsü melena state anaprong nungi nübortemi angatetteptsüla, ta paisa shisem.
Tesüiba mapang Nagaland ya Assam kübok liasü, anungji asenok külemi liasü aser maneni külemi liyonga aotsü. Asenok tsüngda tesentaktep meraksai tajungba akümtsü atema mapang shia ajuruteptsüla, ta Nagaland Chief minister-isa senden nung ashi.
Assam nung arrtsü anasa alirtem dang Dimapur nung aliba Airport aser Railway teyari agitsü atema ajungmesotsü aser arrtsü anasa aliba Nagaland kübok Intangki aser Assam kübok Dhansiri Reserved forests tem kümzüka ayutsü atema T.R Zeliang-isa teilemba metetdaktsü.
India sorkari Act East Policy dak rangloker mapa inyakba nung T.R Zeliang-isa ashiba ashiba agi, Kuala Lumpur (Malaysia) nungi tenzüker Manipur-Nagaland-Assam adena South East Asia den gari lenmang tesentaktep yanglutsüla.
Northeast nung aliba State tem shishilembaba maparen nung tongti shilem agidaktsüba ajanga dang iba Policy takok angutsü, ta paisa shisem.
Senden nung Assam Chief Minister, Sarbananda Sonowal-ia ashiba agi, “tanü anogo ya State ana atema otsüsütsü anogo ka lir asenoki linük den külemi terenlok angutsü atema longjemer inyaktsüla.”
Mangatettep ken o tem tangatetba tajung agi angatetteptsü merangtsüla aser tanü state ana nungi Chief Minister ajurutepa senden amenba ajanga state anaprong nung lanupututem ajungmesotsü, ta Sonowal-isa ashi.
T.R Zeliang-i taküm Hornbill Festival nung adentsü jaokba ama shilem agitsü aser taküm Kisama nung amungtsü aliba Hornbill Festival nung Assam nungia telok balalai shilem agitsüla, ta paisa shisem.
Sonowal-isa arrtsülen aliba tesemtem atema local MLAs/ MPs aser sorkar ketdangsertem adenba Committee ka tentettsü atema tebilemba metetdaktsü.
Tanü senden nung Assam Chief Minister den par Cabinet züngsemtem, MLA tem, Jorhat MP aser Chief Secretary Assam-i anir tongti ketdangsertem aden.
Tanü senden nung tongtipang onüktem benoka olemtepba rongnung, Assam-Nagaland arrtsü nung yimjung aser tesünep tensa alitsü, people to people contact atema outreach programmes agitsü, ozüng alema mapa inyakertem indang osangtsüsang belenteptsü, state anaprong nung arrtsü anasa ozüng alema mapa inyakba azüoktsü, Kentok tepsetba mapa azüoktsü aser Assam nung National Register of Citizens yanglushiba nung yariteptsü tem liasü.
Nagaland nungi Chief Minister den KG Kenye, MP (Rajya Sabha), Dr Imtiwapang, Parliamentary Secretary (G&M), Lalthara, Advisor & Principal Secretary to CM, RB Thong, Addl Chief Secretary & Development Commissioner, Sentiyanger Imchen, Commissioner & Ex-Officio Commissioner & Secretary (Border Affairs), LL Doungel, DGP, Himato Zhimomi, Commissioner & Secretary (W & H), Smt Angau Thou, Secretary (Tourism) aser department balala nungi ketdangsertem aden.