Kaziranga tzümetsüng nungi arem shiruru 100 shi kümzük

Guwahati, August 1 (Agencies) : Kaziranga arem nung tzümetsüngba tesem nung inyaker, mobile veterinary service teloki kendok tezü ka tena aliba 10 den swamp deer aser hog deer dena arem shiruru 100 dak tema kümzükogo, ta ketdangsertemi ashi.
Mobile service telok ya Assam Forest Department aser arem shiruru atema inyaker NGO telok ana den lokteper inyaker aser parnoki anogo tenet tsüngda nung arem shiruru 107 tashi kümzükogo.
Parnoki kümzüka aliba hog deer 62 tashi aremi chiokogo, ta arem shiruru kümzükba mapa nung shilem agir telok, Wildlife Trust of India (WTI) ketdangsertemi ashi.
Parnoki kümzükba eastern swamp deer asem rongnungi ana masü alibaji ‘Centre for Wildlife Rehabilitation & Conservation’ nung yaritsü atema bener arua lir.
Mobile service telok dena kümzükba, kendok tezü ka tena aliba 10 rongnungi kabo rescue centre tonga bener maodang asü aser iba sülen ano tanga ka kümzükba ibajibo mapang tatsüka lir chiokatok.
Tetsü den pilar aliba kendok chanu 8 tashi large animal nursery nung anepaludar, ta WTI nung Deputy Director Rathin Barman-i ashi.
Ano pokpo chanu ka den fishing cat ka dena anepaludar.
“Shiruru kümzüka nüngdakba teyari agütsütsü atema shiruru atema doctor aser nurse tem den shiruru anepalurtemi ammang aser sangwa metitemi kanga meranga inyakdar,” ta veterinary department nung lenir Panjit Basumatary-i ashi.
Mei mapang iba National park tzü agi metsüngbangba ajanga arem shirurutemi National Highway 37 ajanga Karbi Anglong len aliba tokong bushia aoer.
Taküm tzü kanga metsüngba agi arem shiruru kanga süogo. Balakata hog deer bo gari agi dena aika tsüksetogo.
Kaziranga arem azüokertemi iba ama tzü metsüngba mapangbo NH-37 nung gari speed tatakzük ka nung jajatsü atema ‘time card’ inyakyim ka tenzükogo.
“Tzü lendong ajanga shiruru aika kanga aoksa aser shisatsü nunga kanga anibelemer lir. Tetsü den pilar aliba kendok chanutem ya aika yiruba ajanga onoki mamatzü agütsü dena magizüki liasü ajisüaka dangbo yimya sübadar,” ta Basumatary-i ashi.