Kazütsüba mapang masü

Ibai mokdangba (lockdown) mapang, tetezü asenok onüleni moudaktsüi shibanga yutsüba mapang, anungji kidang tsüraburi anir tanurtem ajak kecha meinyak chiyonga amongtsübaji tang mapangba ya lir. Ajisüaka, ita junga kecha meinyak kidang chiyonga amongtsübaji aikati makoktsü aser akokyonga aji jangratemtsüka masü. Ano, mokdangba ya koba anogo tashi nung koba yimya nung agientsüar memetet, anungji mokdang liaka mapang amajok nung meindoki nisung shia pei dak aketba sempet meteta mazüngi alitsüsa mapa kar apiteta inyaktsübaji kanga tongtibang kümogo. Aji oda, ki yanglushitsü alirtem atemabo ibai mapang tajung ka asütsü aser ki ana nung atsü anepalutsüsa tesem alirtem asoshia ibai aluyimba mapa angazüktsü mapang tajung ka asütsü. Talisa, kidang tanurtem asoshi ibai kanga takoksa anguba mapang lir, kechiyong joko taküm agi kümnabuba parnok kaketrejui moudang class tasen nung amentsüsa akümer. Ibaji aika atema taküm piyong asoshi tangazüktsü tim mangazük akoksar asütsü. Atangji, tanurtem ajak kidang nungi online class nung adener saka online class-ji tesayurtem den tejak ngutepa aser sensaksemteta agir masü  saka school teimbaka sensaker asünungji, tesayurtemi notes zülur whatsapp nung yoker aser tatidang nunga itemji ajizüka zülur agütsür. Ano, online class-ji school-i tesayur aser tanurtem ajak tejak ngutepa aser kati ka den asüngdangtepa class agidi asüyonga, tanurtem aika ket nung smart mobile phone maka aser ano akayonga yimtak yimtsüng nung alirtembo network mangur ta, ka akadang ka maka aser ka angudang ka mangur ta timtem jenti ajurudagi. Iba ama mapang nung kidang tanurtemji odang metoktsüi tsüraburtemia koba tashi nung parnok yaritettsü ta bilema lesson nung aser parnok mapang amshiba nung yaritsübaji kanga tongtibang kümogo. Aji oda, tsürabur aser tanurtem aika asoshi, ashiko, iba mokdangba mapang ya kaket mezüngnüi aliba to kaket azüngtsü sobaliba tajung ka tenzükba mapangang ka asütsüa akok. Kaketshir ka atemabo kaket azüngtsü yimya sübaba sobaliba tetka tajungbabo mali. Kaket mashi ka nunga shisatsü lir, anungji sShisatsü aser temetetba ajak ya kaket azüngba nungi tenzüker. Aji oda, aseni kaket ka azüng nung, yang nung jagi kaket zülur dang nungibo asenang temetetba akümtsüsa shisatsü aika angur aser aseni asen dak temulunglemteta tasü tait nisung ka kümadoker. Ibayongji, tatidang nunga melamelaa takok angur aser peisasaa taküm lenmang tajung bushiteta mapa inyaker meinyakma yateta aoer. Iba denji kidang mapa inyaker meinyakma lir aser mapa shia jagi taküm lenmang (Life skill) sayur. Iba tangatetba nung tanurtem den külemi yakta saker kari soruchioker, kari ki aser kima aoker, kari ak an nem chi agütsür aser kari sü ashir ta anepdang mapa tema yur, ano anüngdang kari sü arür aser kari süng mapa inyaker aser karbo atsü aser farm anepalur ta asen kinungertem ajak kodang kanga mazüngi mokdangba anogotem ya süidaktsüdir, asenok asoshibo iba mokdangba mapang ya skill training agiba mapang amatoang ka kümadoktsü. Atangji, memokdangyonga asenok aikati mapa mangur, anungji mapa maka ta bilema chiyongli kazüli, chiyongli kazüli ta tambur tantsür küma kidang tsürabur nem mesüdaktsür aser ano tsüraburtema karbo, pei apuani nem mesüdaktsüba rogo lir. Ajisüaka, asenoki mapa maka ta bilembaji nükpokeri alima mangu amai, mapabo lir ser nung asenoki mangur, anungji mapa angutsüsa asen tenük lapokjang ta Tsüngrem dang ashitsüla.  Aji oda, asenoki asenoksasa iba mokdangba mapang ya mapa inyak angazükba mapang ka kümdaktsütetra, mokdangba mapang ya lapokdangbo, asenok training institute tajung ka nung course tajung ka tema azüng amai kümer, mapa inyaker meinyakma asen jakdang angutsü. Ashiko, idangjibo aseni mapa bushitsü masü mapaiang asen bushia arutsüa akok. Iba ama takümji aseni asensasa yanglutettsüla.