KBC-i tanurtem saisapong sentong ayonga katsü

March 11, 2017 nü AR ground nung tanurtem saisapong sentong akaba mapang Tongti Tesemdanger, 44 AR, Mokokchung nung Commandant Col KS Kataria den Kumlong Baptist Church, Christian Education Ministry nungi tanurtem aser Sunday school tesayurtem külemi tangokba noksa ka yangi angur. 

Mokokchung, March 11 (TYO) : Tanurtem nem Tsüngremi agüja aliba sempettem metettsü aser parnok tanela tali ajungmesotsü nükjidong nung Kumlong Baptist Church (KBC), Christian Education Ministry-i ‘Saisapong ajanga tesendaktep renlokba’ omen nung ajemdaker tanü Honibarnü 44th Assam Rifles Ground nung tanurtem asoshi saisapong sentong balaka ayonga katsüogo, ta Children Education Ministry, Associate Pastor, Moanaro Imchen-i sangdong ka ajanga metetdaktsü.
Tanur nisung noklang pung (500) shii shilem agiba, iba asayamung sentong 44th AR Commandant Col KS Kataria tongti tesemdanger süa lapoktsü.
Asayamung tenzüktsüba mapang Col KS Kataria-i, India tarutsü putu nenok meyong lir aser nenok linük asoshi nendaka bilemba nisung kaka küma indaktsütsü asoshi tesayurtemi nenok nem tesayuba agütsütsü, ta tanurtem dang ashi.
Saisapongji takok mesüra tamakok atema kija asayar masü, ta ashidang Col Kataria-i armed force temi nüburtem yaritsü teti renema lir, ta shisem.
Armed force temi saisapong ajanga mapang aika nung konang nüngsang bener arutsüogo. Ni North East kaketshirtem dak sempet tajung aliba aika ajitetogo aser linükia northeast lanurtem dak rangloker, ta pai ashi.
KBC (Youth Ministry) Associate Pastor, Dr R Zulu Jamir-i, tarurtem pela agizük aser tetsür chanu, Christina-i tarurtem nem ‘Hero’ ken tenloktsü.
Tanu saisapong nung shilem agir tanurtemji telok pungu küma lemsa — Ezekiel, Jeremiah, Isaiah, Elijah aser Ezra aser item telok rongnungia ano senior, junior aser sub-junior ta lemsatsü.
Penalty shootouts, relay-race dena asemtepba tapu balala, basketball shots, musical chairs aser bursting of balloons den ano tanga saisapongtem ajanga tanurtem kanga pelatep.
Saisapong balala nung takok angurtem nem sempet agütsü.
Kumlong Baptist Church ya Mokokchung jila nung aliba arogo tulutiba rongnug ka lir. Iba Arogo yagi ward ana amokbanga lir — Kumlong aser Mongsenbai aser Christian Education Ministry nung tanur meyirjang ka tenüng ia lir.
Iba sentong takok ma nung tembangba asoshi KBC Christian Education Ministry-i 44th AR, Commandant Col KS Kataria, Sunday school tesayurtem, tanurtem aser tsüraburtem den pelaba lemsteper, ta sangdong ajanga ashi.