KCK-i vice principal Zetso Sakhrie den tepila sentong agi

Kohima, January 27 (TYO) : January 27, 2016 nü Kohima College Kohima (KCK)-i vice principal Associate Professor, Zetso Sakhrie den tepila sentong ka agi.

Zetso ya English Associate Professor lir aser lai 1981 nungi Kohima College nung inyaktsü tenzük aser küm 35 tashi inyaka arudang küm pungu atema vice principal ama inyaksema liasü.

Tanü la den tepila sentong agidang, Zetso-i college nung tesayurtem, non-teaching staff, taoba aser tang tezüngdak kaketshir ajak dang pelaba metetdaktsü.

Laisa Dr. Shürhozelie aser state sorkar nem tenüngsang agütsü. 2006 küm state sorkari Kohima College bendanga agi aser iba ya Dr. Shürhozelie ajanga liasü.

Sentong nung KCK principal, Dr. Watijungshi-i Zetso nem tenüngsang agüja jembidang ashiba agi, Zetso-i college atema kanga dang bendanga agüja aser nendaka inyak.

Kohima College Teachers Association tenüng nungi KCTA tir Mhalezolie Kire-ia Vice Principal menden nung anisüngzüker, Zetso Sakhrie nem tenüngsang agütsü.

Lai college atema bendanga agüja inyak aser ibaji ajiteta 2010 küm la nem ‘Best Teacher Award’ agütsü ta Kire-isa metetdaktsü.

Sentong nung mendenji Associate Professor Ameu Kire liasü, Asst. Professor Lily-i temoatsü meshia sarasadem, Evangelical Union, KCK ajanga ken ka aten, Yanger, Ministerial Staff aser Kohima College Students Union General Secretary nati o jembi aser Asso. Professor Dr. B. Khing-i tenüngsang agüja sarasadem.