KCR-i Patnaik, Mamata, Mayawati aser Akhilesh nunger ajurutsü

New Delhi, Luchii/December 21 (Agencies): Federal Front ka tentettsü nükjidong nung tanü Telangana Chief Minister aser TRS Tir, K. Chandrashekhar Rao (KCR)-i, taruba hopta pai Odisha aser West Bengal chief minister tem ajurutsü, ta metetdaktsü.
Amongnü Telangana Rashtra Samithi (TRS) Tir, KCR-i Bhubaneswar nung Odisha Chief Minister, Naveen Patnaik ajurutsü aser Hombarnü pai Kolkata nung West Bengal Chief Minister aser TMC tongti, Mamata Banerjee ajurutsü.
Lenir ana ajuruba sülen KCR-i New Delhi nung taoba mapang Uttar Pradesh chief minister ana- Mayawati aser Akhilesh Yadav na ajurua tena den senden balala amentsü.
Tawa Assembly elections nung TRS-i takok tulu anguba nung ajemdaker KCR-i linük yimtenren nung ajemoktsü telemtetba agiogo, iba denji külemi BJP aser Congress medeni front ka tentetsü melungtetogo.
December 11, 2018 nü election osang sangdongba sülen pai, kobi melii regional party tem nungi lenirtem tangatettep kati arutsüa akok, ta metetdakja liasü.
Tanü Chief Minister’s Office osang ajanga ashiba agi, TRS-i ita ka piyong atema tayimtsü ka mekazüka yuogo.
KCR den par kibong züngsemtem iba tayimtsü nungji Visakhapatnam (Andhra Pradesh)-i aotsü aser kasa nikongdang Visakhapatnam airport nungi Bhubaneshwar (Odisha)-i oa CM ajurutsü. Aonung yipzükba sülen pa Kolkata-i aotsü.
Banerjee ajuruba sülen pa New Delhi-i oa yangji anogo asemnü amongtsü. KCR-i Ato kilonsera ajurutsü aser Central Minister kar ajurua state dak sendakba onük lemsateptsü.