KCS Phek Silver Jubilee amung

Phek, March 04, 2017: Honibarnü Phek jila nung Kiddies Corner School (KCS) küm 25 ajungba Silver Jubilee benjungmung nung tongti tesemdanger, MLA, Kuzholuzo Azo Nienu jaoker amungdang tangokba noksa ka angur.

Phek, March 04 (TYO): Tanü Phek nung Kiddies Corner School (KCS) küm 25 ajungba Silver Jubilee benjungmung nung MLA, Kuzholuzo Azo Nienu tongti tesemdanger jaoker mungogo; iba sentong nung jembidang pai, anüng kübok ajak atema mapang ka lir, aser tang mapang ya Nagaland state nung tesünep aliba mapang lir, ta ashi.
“Naga nungeri “tai atokba aser amatokba” olongtem ya tanaben shisadangtsüla, aser Khristan state ka nung timtem, tejashi aser mokokachi nungi talenba salatsü atema item olong ya mapa küma benshitsüla. Asenoki Khristan ka ama temeim, aria bilemba aser tatok agutsüba benshitsüla,” ta paisa ashi.
“Khenyongi tatok agutsüba ajanga dang taneptsü aser asen zübo samatsü tashi angur. Asenoki azütokshi, tesempa aser mangyangba dang nungibo yimjung aser taitok atema tejangraba,” ta paisa ashi.
Tawa state nung tatalokbatem dak sentakba nung pai, “12buba Assembly ji Nagaland putiotsü nung tensa tamajungtiba mapang liasü, aser iba atema mepelar. Mapang tatsüka anünga alibaji kanga shisa kaa amshitsüla aser iba mapangji Naga nunger adianu temeimtep atema yimjung, taremzük aser telongjem asoshi amshitsüla,” ta pai ashi.
“Lenirtemji tang atema dang bilema alirtem masütsüla, saka lenir ka ama kin aser party mebendangi tarutsü atema bilema inyakertem asütsüla,” ta paisa metetdaktsü.
“Sorkar aser party balala arutsü aser aotsü, ajisüaka Naga nungeetem yangisa alitsü, anungji asenoki kin, tangatetba mesüra nija ta telemsa makai adianu temeimtep alitsüla. Kodang nü melungjang nung temeim lidir ibaji kotak li mesüka asutsü, ajisüaka asen melungjang nung tesempa aser nükmerem lira, ibajibo alima nunga molumi asutsü,” ta MLA, Azo-isa metetdaktsü.
Kanga nüngdaka aliba mapang ka nung Kiddies Corner School ya lapok, ta shia pai tamalen iba school lapokertem dang pelaba metetdaktsüba den külemi pai, nija school tem mali nungbo tanü Nagaland-i iba jenjang metongteti lila, ta shisem.
Iba sentong ya Wb. Kuthovo lenisüba nung agi, PTBC Pastor, Thupuchi Khesoh-i sarasadem aser Chairman KCS, Vekhozo Khamo-i tesentepertem pelaa agizüka liasü.