KDCC-i COVID-19 hospital & BSL-3 lab semdang

Kohima, May 11 (TYO): COVID-19 wara atema Nagaland aser talisa Kohima nung maparen renemba atema tebilemtsü bena Kohima District Congress Committee (KDCC)-i tanü COVID-19 Hospital aser Naga Hospital Authority Kohima nung Bio-Safety Laboratory (BSL-3 lab) yangluba semdanga liasü.
Iba mapang NHAK Managing Director Dr Thorhusie Katiry aser ENT Specialist Dr Kedozeto Punyü nati Congress lennirtem dang COVID-19 hospital indang osang metetdaktsü.
Tenati Personal Protection Equipments (PPEs), tebur aser tetsür atema ward, ICU with ventilators amala indang osang lemsatep. Temulung melemi bilemba nisungtem indang sample Manipur kübok Imphal nung tendangtsü atema bener yoker, ta Dr Thorhusie aser Dr Kedozeto natisa ashi.
Sorkari agütsüba PPEs aser tanga osettem jenjang koma lir ta Congress lennirtemi asüngdangdang, sorkari osettsüset tajungtem dang agütsüogo ta ketdangsertemi langzü.
COVID-19 testing laboratory yangluba atema BSL-3 in-charge Dr Tina Khamo-i ashiba agi “iba lab tekaraba nung lapoktsü atema kanga meranga inyakdar.”
“COVID-19 hospital nung maparen renema aliba ngua temulung asür aser state sorkar May 7, 2020 nü okadak dang BSL-3 lab lateta aliba anogo nung renemtsü ta nangzükba ama mapa inyaktsü imlar” ta KDCC president Kevi Vizo-i ashi.
Iba mapang KDCC-isa NHAK ajanga COVID-19 anema mapa inyakba nung amshitsü atema senotsü teyari agütsü.
Tanü KDCC tir Kevi Vizo-i anir Nagaland Pradesh Congress Committee Working President i/c Kohima district, Khriedi Theünuo, taoba minister Seyiekuolie Kesiezie, Nagaland Pradesh Youth Congress president Vilhousielie Kengurüse aser KDCC Mahila president Vilanuo nungertem liasü, ta KDCC press secretary Yangertemjen-i sangdong ka nung ashi.