KDCC-i Khristmas jeli sentep sentong agi

Kohima, December 12 (TYO) : NPCC Conference hall, Congress Bhavan nung Kohima District Congress Committee (KDCC) pur Honibarnü Khristmas jeli sentong agiogo.
Sentong nung o jembir, Dr. Er. Vikuotuolie Angami-i, tan Khristmas ya tepela tasen, tebilemba tasen aser nükla tasen anguba benjung ka südakjang aser alima jangratem ajak toktsür Yisu Khrista sülen chichia anidaker sepai ka ka asütsü merangdi, ta ayongzük.
“Nüburtem temenen nungi kümzüktsü asoshi alima ya kanga junga melenshitsü nüngdak. Khristmas ajanga asenok temenen nungi kümzüksang aru. Asen kümzüksang Kibuba tenüng asanger,” ta paisa ashi.
NPCC Tir K.Therie, NDA aser DAN sorkar naprongi mapa ajak nung kanga tamakok aludaktsüogo, ta ashi.
Pai state nung mepetmesü aser teraksa atema temulung raksaa bilemba lemsatep.
Paisa, “Ni tenüng mashir saka 2018 küm agitsü aliba election nung Congress ticket amer toktepner nisung tajung aika lir aser iba election nung congress-i takok angutsü imlar,” ta ashi.
Iba sentong, KDCC general secretary (Admn), Abalie Medoze-i ketdang asü aser sentong tenzüka Vikrosa Zecho-i sarasadem. KDCC Tir Kevi Vizo-i telok pela agizük aser Sabu Sote, David aser Medongunuo Vizo nungeri ken aten. Sentong tembanga KDCC Tatong Tir Khriesanyu Pienyu-i sarasadem.