KDCC-i September 24 nü atalokba jangjashitsür

Dimapur, September 27 (TYO) : September 24, 2015 nü PCC members, DCC Presidents aser ACCC Presidents Delegates Meeting meinprongtsü atema Kohima District Congress Committee (KDCC)-i züngsem shinga nema temelaba magütsü, ta KDCC sangdong ka nung metetdaktsü.
Senden agiba tesem tobur junga yanglutsü aser menden alatsü atema dang KDCC volunteers nem mapa lemzüksü, ta KDCC tir Kevi Vizo-i sangdong nung shia lir.
Party lennirtemi parnok jurila nisungtem anir aru aser official delegates menden rakzüka amen aser parnok dang menden azüngtetjang ta mepishiaka parnoki mazüngtettsü, ta paisa ashi.
September 24, 2015 nü Congress Conference Hall, Kohima nung mepetmesü atalokba atema sasa bilemer. Ajisüaka, Indian National Congress Party ya linük nung yimten telok tejentiba lir aser party nung yimyatsüya tajung benshiyonga aruba agi tanü tashi yimten telok ka ama lir anungji ibaji züngsem ajaki meteta alitsü tim, ta KDCC tirisa shisem.
NPCC Tir, K. Therie lenisüba kübok KDCC-i maneni inyaktsü aser party asalendong aser tangatetba nung ammeter aotsü, ta Kevi Vizo-isa metetdaktsü.