KDCC-NPF-i nüburtem tenüng asang

Dimapur, Rongchii/April 23 (TYO): Kohima District Congress Committee-Naga People’s Front Kohima division (KDCC-NPF) Election Coordination Committee-i, Kohima district nung April 11 nü Lok Sabha election süngjem süngjema katetba atema nüburtem tenüng sangogo.
Parnokisa, political party anaprongla nung inyakertemi longjemer PDA alliance, shirnoki North East nung alirtem aser talisa Naga nunger liyonga aotsü asoshi tetsükdaktsü bener arutsü, parnok den toktepba nung teyari agütsüba atema kanga pelaba lemsatep.
District nung aliba nüburtem tenüngsanga KDCC-NPF Coordination committee-i constituency balala nung aser talisa Northern Angami-II Assembly Constituency nung nüburtem aikati arua vote agütsüba ngua süngmangba lemsatep.
Northern Angami-II A/C nung vote agütsür shilem 84 liasü aser polling station kar nungbo voter tem shilem 92 nungi 97 tashi arua liasü, koba State general assembly elections den medemdangra khenyongi balaka lir.
Maneni KDCC-NPF coordination committee-isa, iba dak sendaka aliba ketdangsertem dang ken o asadangtsü aser tarutsü nungbo iba amala vote aika agütsüba polling stations tem nung webcasting mesera CCTVs amenoktsü asoshi mepeshi, ta KDCC-NPF Election Coordination Committee, Media and Publicity Cell sangdong ka ajanga metetdaktsü.