KDTODU-I ketdangsertem dang mepishir

Kohima, September 10 (TYO): Kohima District Truck Owners’ and Drivers’ Union (KDTODU)-i takhangba onük kar Commissioner of Police Dimapur, Deputy Commissioner of Police, Dimapur, Deputy Commissioner, Kohima aser Angami Public Organization dangi benokogo, ta KDTODU Tir, Khriesalie üsou aser Küvethi Puro nati sangdong ka ajanga metetdaktsü.
July 27 nü Union-i item ketdangsertem dang Purana Bazar tashi gari tulu maitdaktsüba agientsü atema mepishiogo, aji süaka tanü tashi iba atemaji mera agia mali, ta sangdong ajanga ashi.
Dimapur ya state nung shishilembaba yimtiba lir aser anüngdang yimti tiyong nung traffic timtem Union-i angateta yimti tiyongi gari maitdaktsüba atema onoki mashishir, ta kasa sangdong ajanga ashi.
“Ajisüaka Purana Bazar-i maitdaktsüba atema ashishir, kechiyong tang traffic ozüng tasenba benokba sülen anepdang 9:00 ako nungi nikongdang 5:00 ako tashi Kohima tsütsülen nungi aruba gari tulu ajak T.L Angami Park, New Chumukedima nung soter, aser ibaji ajanga truck anishirtemi timtem aika ajangshir. Iba dak alia iba ya ajanga nisung tamajungertem ajurur, kechiyong nikongdang menurang gari senzü tenzüker, aser ibaji ajanga truck anirtem, kibur aser gari hire asürtemi timtem ajurutsüsa tensa ajurur,” ta Union-i ashi.
Purana Bazar tashi nungbo traffic timtem kangabo mali ta ketdangsertemi meteta lir aser iba junction tashi gari senzütsü mela nunga kecha balaka masütsü, kechiyong iba yagi yimti tiyong mamshir, ta sangdong ajanga ashi.
Anungji union-i ketdangsertem Purana bazaar tashi kecha tenokdangba makai truck senzütsü temelaba agütsütsü mepishir. Iba temepishiba ya September 13, 2015 nü tashi nung magizükra Union-i lungkak aita truck mesenzütsü, ta kasa sangdong ajangasa metetdaktsüogo.