Keane football asaya nungi anener

Dublin, Yimpoksüi/November 28 (Agencies): Ireland nunger nüngtugu football asayar Robbie Keane, küm 20 dak tema asayar asaya nungi anenogo. Pai Rasemnü ashiba agi, pa Dublin nung football asayatsü jangrasetba asangur chanu ka ama ina atuba mapang imlabatem ajak pa indang career ajanga ajatetogo.
Arishi küm 38 asayar ya par linük nungi goal timtiba (goal 68) agütsüsang lir, aser pa tang Ireland handler tasenba Mick McCarthy kübok assistant manager ka ama rangloker inyaktsü.
Taoba hopta manager Martin O’Neill mapa nungi anentsüba sülen Keane-i assistan mapa atema Roy Keane melenzükogo.
“Küm 23 jangratema asayar tanü professional footballer ka ama asaya nungi anenba sangdonger,” ta Keane-i ashi.
“Crumlin United nungi alima ajunga sema Milan, London aser Los Angeles nung asayaogo, koba ni pungmang nunga mepungmang.
Maneni Keane club balala nung kanga takok ngua asayaogo aser player/manager ka ama India club ATK nungi tatemsa asayaogo.
Keane-i Premier League nung 349 ben asayaba nung goal 126 idaktsüogo, koba Tottenham Hotspur nungi asayaba mapang 91 idakja liasü. Pa Coventry, Leeds United aser Liverpool nungia asayaogo.
“Arishi küm 15 asüdang professional career ka asoshi ki toktsür England-i aoba ya mapang talangka tejakdang atalok ama bilemer.
“Ni yimtong nung asayaa intetba nisung ka saka takok angutsü asoshi temulungtetba aser nükjidong liasü.
“Ni nüngdakba ajak agi maongka ka dang nüngdaka liasü,” ta pai ashi.
Linük tenüng nungi asayaba dak sendakba nung Keane-i ashiba agi, “Linük tenüng nungi captain ka ama aser asayar ka ama asayaba ya kü indang career nung tongtibangtiba liasü. Ni küm18 shi Ireland team nungi jangradema asayaogo aser ni Irish nünger ka ta ashitsü ya tepang agi ashitsü mekoki nema danga bilemer,” ta keane-i ashi.