Kecha makaba atema tenüngsang (T. Ken 106:6-15)

Khen khenbo asenok asoshi sarasadem melangzübaji tajungtiba lir. Ken züluri ashir, “Aser parnok temepishiba pai parnok nem agütsü, aser parnok madak tashidak yok” (t.15). Israel nungeri merumerua sarasadem. Tsüngremi Kotak nungi parnok manna agi mesüa liasü, saka parnoki shi chinü. Anepdang shia parnok teinyaktsü ajunga agi süki nungi adoka angüma lur senti, temerük, tanang, taküm agütsüba manna shitentsübaji dang liasü. Saka mapang tatsü ka nung parnoki akhi chiyongtsü chiyongnüa aküm. Parnoki ashi, “O, kari onok nem tachitsü shi agütsü asübo.” Anungji Tsüngremi parnok nem shi agütsü, saka parnoki aji achi aika asü (Züng. 11:31-33).
Iba nungi asenoki lesson angazüktsü akok. Mezüngbuba, merumeru sarasademji lendong. “O Tsüngrem, ni ibai dang aginer,” ta ashitsübaji koda lendong ? Iba ama sarasadem nung kodanga tajangzük mali. “Nai asüngdanger aser mangur, kechiaser nai aibelena meshir, nai ne tejangraba nung amshitsü meshir” (Yakob 4:3).
Tanabuba, nai ne jakla melenshitsüla. Israel nungeri parnoki mepishiba angu, saka parnok jakla nung meyari. Shitakba nung parnoki meshiba ngur külen parnok jakla tamajungba aküm. Tamadokba chiri ashi, “Oba, kü nem kua.” Pai meshiba pai angu, aser pa taküm raksa. Idangji pa kidangi aru aser ashi, “Oba, ni yanglujang”- aser pa jakla melenshi. Pa shidakba jabaso ka akümtsü tenzük (Lk. 15:19). Merumeru sarasademi asenok jakla tap kümdaktsür, saka Tsüngremi mulungba ama sarasadem agi asenok jakla yanglutsü.
Asembuba, asenoki teti Tsüngremer mulungba asoshi sarasademtsüla. Sarasadem nükjidongji nisungi mulungba kotak nung inyaktsüba masü, saka Tsüngremi mulungba alima nung inyaktsüba nükjidong lir. “Ne mulung süang” ta ashitsü kodanga tarendak.
Ne sarasadem koda langzütsü Tsüngremi tajungtiba metet- itemji langzütsü melangzütsü. Ken züluri sarasadem telangzüba angutsüsa sarasademtsü tetuyuba asem agütsür. Nai itemji ne sarasadem nung amshir asü masü? Tsüngremi ne sarasadem Pai mulungba den sendaktepa amshidakjang. Pa telangzüba asoshi Tsüngremi na renemdakjang.