Kecha tejembitsü maka !

Tan Nagaland tatar senden tazüngtsübo anogo asem saka shitakba amenbabo anogo ana Mongolbar o Brehostibar na amenba tatar sendensa tatsütiba asütsü südi ta mentetogo. Iba tatar senden mezüng anogo Mongolbar nü minute 15 dang amen aser tanabuba senden Mongolbar nü minute 45 shi amen. Iba tatar senden anaben amenba nung mapang ghonda ka shi endoka ken o kar benokba nung tongtibang kaji Nagaland nung Catholic University ka lapoktsü asoshi latetbaji asütsü. Iba dakji alakabo tan tatar senden aliba yabo tatartem ita sen atutsü atema telemtetba agitsü asoshi jatepba amai liasü. Pei agitsü ita sen aser allowance-tem atutsü asoshi jembir asünungji ken o balaka ashishitepa jembitsü madoker, anungji nunga ta ashir mali melamelaa telemtetba agiogo. Atangji, tanü asüng nüngdakba kechisarina ajak nung jenjang atunungji talitsü tasak, anungji ita sen dang masü anogo sena atutsüla. Aji oda, yimten yimsüsür ka asoshi ita sen lakh kaji aika masü, anungji akok nungbo ano aika atutsüla. Ajisüaka, shitakbabo tang ya Nagaland nungbo yimten yimsüsürtem ita sen atutsü jembitsüba mapangbo masü kechiyong ibai state nung inyakertem nema ita sen magütsütetba mapang ka lir. Pei senzütsü lenmang ayong ama kümer lia ita sen atutsü jembitsübaji, shitakba nungbo, taaktsüka lir. Aji oda, shitakba nungbo ibai ita sen atutsü indang jembitsüba mapang masü saka yimsüsür shia pei ita sen saruteper state nung gari lenmang aser mozü kitem yanglushitsüba mapang lir. Ajisüaka, lemtetadoker asünungji tanü yangi züluyongbo ibaji waro orr tembang akushir amai dang asütsü akok saka iba ama yagi asenok mulungjang nung teti jembidaktsüdi. Tanü tensa Nagaland nung yimsüsürtem jembitsüba onük jembir mejembima lir, kechiyong ajaklen tebilemtsü lir. Tatar senden nung opposition ali mali ta masü saka tatartem rongnung Naga nunger tebilemtsü benoka jembitsüsa nisung ali asü mali ta asübaji tongtibang lir. Atangji, Nagaland tatar senden nung opposition malibaji junger asütsüa akok saka aji Nagaland asoshi takok konang kabo masü. Aji oda, yimten tebilemtsü aser nübortem nüngdak reprangteta ken o benoka jembitsübaji opposition alidang dang jembitsüba masü saka government nung alirtemiang shisatebuluba jembitsüla. Naga yimten tebilemtsü onük Delhi nung tepdaka yur melatetteter saka Naga nungerbo telokang teimba akümer, kaketreju nung kakeshirtem tim tangutsü mangur, mozü kidang mozü mangur, gari totzü nung tzümartemi kerosene enoker Naga nungertem dang ayoker, bendangertem dang danga taaktsüka gari lenmang agi gari lenmang memesük kümdagi, tesem tesem nung light junga magütsüba timtem angashir. Ajisüaka, alemli shitsü asem tenük, tenarong aser tebang nembanger kazüba otsü amato, tanü yimten yimsüsürtemi item timtem indangji mangashir, mangur aser mejembir. Itemji jembi nungbo tatar senden ita junga amenyonga mejembimatsü. Yimten aser lokti senden nung ken o benoka jembiba ya kati ka aitsütsü aser tai aputsü asoshi masü saka alima aser nübortem asoshi shitakba nüngdakbaji kechi aser teinyakertemi koma inyaker ta metetdakja temulung agütsütsüdaktsütsü asoshi jembir. Iba jagi nübortemia pei temeten dang masü saka pei khuret aser teinyaktsüa angatetter aser ajaki pei lima ajungtsü atema süoki ia bilemer. Aji oda, tanga mejembiyonga, kechiba Nagaland nungbo gari lenmang anepalu mesütetter? Kechiba government mozü ki junga anepalu mesütetter ? Kechiba light junga magütsütetter ? Kechiba government school majunger ? Naga yimten tia koma lir ? Gari totzü o kerosene na aser jang tajung o tamajung na meyokteper ayoker süra, itemji koma bushisüngdangdar ? School tanur chiyongtsü agütsüba jang nung mesen lir asü süra, ibaji koda ser aser komaka bushisüngdangdar ta nübortem nem metetdaktsütsü asoshi danga yimsüsürtemi jembitsüla. Atangji, mejembili süra kecha tejembitsü makatsü, saka pei khuret metetba nüchi purtemibo pei nübortem timtem takoksa ajuruba tia ngur aser angashirbo mejembi maremtsü. Ajisüaka, tanü asen tebilemtsü madak tebilemtsü agi sünger alidang, yimten yimsüsürtemi tatar senden nung item tebilemtsüji benoka mejembiba tebilemtsüjisa tuluba kümogo.