KECHI AGI TANELAREN TULU KÜMDAKTSÜR?

-Rev Luin

Saka shirnoki Kibuba dang ataa alir parnok tashi tasen angutsü; mongzütem ama tashikang agi atutsü; parnok asemtsü, aser aniseta malitsü; parnok jajatsü aser melulatsü. Isaia 40:31
Nai kechisa inyaker ajak nungji tashi aor, tashi angutsü aser tasen akümtsü lemang ka lir, ibaji Kibuba dang ataa aliba. Sarasadem sempet akartemi talanglang sarasademtsü akoker ta aikati bilemer. Ajakji kechi taküm yimya nung alir iba dak aket; aniseter teimla makaba ka mesüra mongzü ama tashikang agi tenemi yima tuner. Tenzüktsü asoshi shidakba lemangji Kibuba dang ataa alibaji lir aser kodang na aniatoker ibai anener Kibuba dang ataa alitsüba mapang. Ne taküm nung yamaji anenzükbaji kodanga tesama masü. Ibai ajaklen na kong lidir Kibuba arua ne taküm Tsüngremi yimsü südaktsüba lir. Kasa mapang mapa tuluba aser temaba asoshi na tashi itshia kümküm kümküma kümdaktsür. Tashi tasen agi tongbangji raratsü ne nem tashi tasen agütsür. Iba yagi satan tsübudaktsür aser pa temulung lema aliba samadaktsür.
Pa dena aliba nung na mezüngbuba tashi ngudaktsür. Tatem makai na tashi taitba-taitba akümtsü. Shirnoki ataa aliba miimji metetter parnok shisa taka kechiaser parnok kodanga ania makümtsü. Ataa lir külen yima atutsübaji arur. Kechai parnok sottsü makok. Parnoki meimchir shisatsü agi matangba aser satan tenük nungi miima aliba telungtet limai aor. Parnok kodanga melular kechiaser kong ataa alitsü parnoki metet. Parnok teti tashi ita alir kechiaser ataa alibaji parnoki teti inyakba shilem ka lir.
MAPANG SHIDAK NUNG TEKÜMDANGTSÜ AGÜTSÜ
Tekangshidak tamang teyu aser rakzükraktemer dak amajok teyimla teka: rongsen renlokra, ne mulungjang yangji teyu. T. Ken 62:10
Tsüngremi ne dak temulung alemtsüsa lira Pai rongsen aser tanelaren moatsütsü (2 Kor. 9:6). Saka Pa temoatsü den asenoki meinyaktsüba tütuyuba (condition) kar agütsür. Yangi nai inyaktsüba jenjang pezü agütsür.:
1)    Ne shilem kecha tekang: Nai ne sasa ashitsü südi, ” Iba rongsen ya ni atema ni inyak.” Saka  iba rongsen bendentsü asoshi ne Tsüngremi ne nem tashi agütsü ta ne Kibur bilemtetang. Ni pei ain aser tashi agi iba rongsen ni asoshi nguogo ta mashitsü kümdangang. Saka nai Kibuba ne Tsüngrem bilemtettsüla, kechiyong ne nem ne rongsen angutsü ain agütsübaji Pa lir… Nai Kibuba ne Tsüngrem amar, tangar Tsüngrem sülen jajara, aser parnok tenzükra aser parnok külemra, atangji nenok samatsü tanü nenok anema Ni kuli agütsür.” (Tazüng. 8:17-19).
2)    Tangar tamatok! Angang: “Shirnok akümli nung takar parnok temulung moulutsü, mesüra shitak memetetba rongsen nung teimla mayutsü, saka Tsüngrem shibai kechisarena asenok nem peria agitsü ajak agütsür, Pa dak imlatsü melaang… tarutsü mapang asoshi pei atema tazüngdak tajung rizüngdakjang.” (1 Timo. 6:17-19).
3)    Mezümeküm tesü. Angang: “Kibubai yamai ashir, shisa akar nisungi pei shisatsü nung asü teküm, mesüra tashi tulu nisungi pei rongsen nung asü teküm. Saka shibai asüakümer iba nung asü kümdakjang, oda pai ni angatetter aser metetter, oda alima nung temeim, yimlibilem, obendang, temeshiba inyakbaji ni Kibuba lir, kechiaser item nung Ni pelar.” ( Yr. 9:23-24).
4)    Tsüngrem melen kecha telidaktsü! Angang: “Kü dak nungi tiyazü aser tai talangi agienang: Kü nem sensak tia mesüra rongsen tagütsü: Ni asoshi tenüngdaktsü chiyongtsü agi ni mesüangma; Ashiko, ni tepok süngerbo Na menangzüktsü, aser ashitsü, Kibubaji shiba? Mesüra ashiko, ni sensaktsü aser auyatsü aser Tsüngrem tenüng amajok nung amshitsü” (A. Shin 30:8-9). Ne meyong kecha maka – na Pai mulungba inyaker ka dang ta bilemtettang.
Anungji tanü, iba yagi mapa tajung ka inyaker ta jangjaa angatetang.