Kechi arudir aruka Muslim nungeri India metoktsütsü : Asaduddin Owaisi

Hyderabad, November 24 (Agencies) : Kechi arudir aruaka, Muslim nungertemi kodanga linük toktsür maotsü aser maneni India nunger ama nüma tanga alitsü, ta All India Majlis-e-Ittehadul Muslimeen (AIMIM) tanishir Asaduddin Owaisi-i Mongulbarnü metetdaktsü.
“Sangh Parivar aser tanga loktiyimten anema noktakba teloktem küboki Muslim nunger maitsü, saka Linük Temzüng ajanga agütsüba ochi obendang, shilem aser temetet atema maneni onoki noktaktsü” ta Hyderabad nungi Lok Sabha MP, Owaisi-i ashi.
Linük nung tensa mejungi akümba ajanga par kibong linük toktsür aotsü asü koda ta pa kinungtsüi pa dang asüngdang ta Hombarnü Bollywood actor Aamir Khan-i olen ka jembiba atema osangbenertemi AIMIM tanishir dang asüngdangdang, “Ni film star ka atema mejembitsütsü. Ni Indian Muslim ka ama dang nüma tanga jembitsü aser ni kodanga Sangh Parivar aser tanga loktiyimten anema noktakba teloktemi asalentong yangluba küboki maitsü” ta pai langzü.
“Iba ya ozü linük lir anungji parnoki onok mulungjang aser shisatsü nung tetsübu tia bener marutettsü. Iba alima mesama tashi Muslim nunger India nung India nunger ama nüma tanga alitsü” ta Owaisi-isa shisem.
“Onok iba linük nung asoba agi dang India nunger masü saka onoki India nunger asütsü shim. Onok anema inyakba tatalokba aika nguogo, mepetmesü aiben atalokogo, nisung meyirjang aika samatsüogo. Babri Masjid raksatsüba onok tenük agi nguogo” ta Owaisi-isa metetdaktsü.