Kechiba AFSPA anema ola madoker ?

Tawa RSS teloki Jammu & Kashmir, Nagaland, Manipur aser tanga  tesemtem kongsa Armed Forces Special Powers Act (AFSPA) ozüng agüja ali, item state-tem nungji iba ozüng ya magientsüla ta metetdaktsüba sülen Union Defence minister, Manohar Parrikar-ia AFSPA ozüng medenibo army-tem mapai meyoktsü ta metetdaktsüogo. Atangji, Jammu & Kashmir aser Nagaland dena Northeast nung yimten nüchiso bushir telongpurtem aliba agi sepaitem asoshia lendong aika lir, anungji parnoka kasa nisung dang asünungji telongpurtem ket nungi kümzüktsü asoshi sademsadema inyaktsüsa tashi aser temeten nüngdaker. Ajisüaka, telongpurtem makdoktsü asoshi army-tem nem AFSPA ozüng amshitsü latettsüba yabo nübortem ajak asoshi kanga tetsübutsü lendong aketba mapa ka lir. Iba  ozüng yagi army tanishirtem rongnung Commissioned officer, warrant officer, non commissioned officer aser parnok den kasasa jenjang nung alir tanishir mashi kati nüngdaka ta bilemra mashi nisung ka  dak akhatsü mesüra tashiyim amshia merenshitsü temelaba tashi aser temeten agüja lir. Ano, sepai tilar katia nüngdaka ta danga bilemra warning agütsür injang yoktsü akoker. Sepai ka nem pai temulung melemi bilemba kisüng agi nisung kasettsüsa tashi aser temeten agütsüba tashiji nisungi tizüktettsüla tashi masü. Aji oda, iba ama ozüng tamajung ajanga nisung khaseta endokba dang masü saka ano taoksaktsü aser takoksatsü kaji, iba ozüng ajanga army-temi inyakba mapatem anema okadak keno benoktsü makoker. Iba ozüng ya tamasa 1958 küm Naga nunger telong nung alirtem dang masü saka Naga nunger tema nung alir yimtaklirtem dena kangshitsü asoshi latet. Aji oda, tanü tashi iba ozüng yagi army-temi Naga nunger mezüngmeshiba, kangshiba aser samatsüba kibong shia nung ajurudagi. Iba kasa ozüng ajanga tashi amshia army-temi nü dak temulung melemi bilemra mapang mashi ka nung kecha warrant magütsüi na aputsü akok aser kecha temelaba magii nür ki telong tashi aita sepaitemi mittsü akok. Iba amaji AFSPA ozüng amshia army-temi asenok mezüngmeshia amshiaka, puaka aser khasetaka, center sorkar nungi temelaba magütsüra iba ken o ji okadak benoka jembitsü makok. Nübortem asoshi iba ama lendong tuluji iba ozüng nungji sendaka lir. Atangji, tangbo India sepaitem o Naga nunger linük tenzükertem telok balala tsüngda yimjung nung lir. Ajisüaka, tarendaktsü aser kümdanga alitsüba mapa kaji, yimjung liaka state nungi AFSPA ozüngbo magien asünungji, mashi mapang ka nung kodang armytemi nüngdaka ta bilemdir, idangji asenok ki lapoka aittsü aser kidang osettsüset ajak bushia mittsü aser parnoki dang nüngdaka ta bilemra khaseta yutsütsü. Tensa mejungaka iba ama tashi amshitsüsa sepai ka nem temeten agütsüba yabo tulur tilar kecha mali, senso ajak asoshi lendong lir, anungji agiendaktsütsüla. Iba tangatetba nung tamalenbo Naga nunger lokti tentet aikati AFSPA anema ola adoka aruogo aser talisa Naga Peoples Movement for Human Rights telokibo supreme court tashi nung ken o benoka lir. Ajisüaka, tang RSS aser center sorkari Nagaland dena Northeast nung iba AFSPA ozüng ya magientsü ta akangshia renemba mapang ka, NNC dak alaka, Naga nunger shingaia ola madokba ya tesüngmangtsüka lir. Aji oda, NPF mesüra BJP teloki yimsü asüdangbo AFSPA aliyonga Naga nunger asoshi lendong mali ta bilemra, ajiang asenok asoshi lendong tuluba asütsü.