Kechiba Foothill Road nüngdaker ?

Yashi asenoki asenok nüngdak ataloka jajatsü atema foothill lenmang nüngdakba indang shisalemsatepogo aser ano maneni tanüa kasa foothill lenmang ya kechiba nüngdaker ta asenok külemi bilemdangner. Atangji, koba lenmang südirsüaka lenmangji nisung jajatsü asoshi lir, anungji foothill road ta ajaba tenemtsüng lenmang yaa Nagaland tesem ka nungi Nagaland tesem kati aodang Assam majangi lenmang tajungba aser tatsüba nung jajatsü asoshi nüngdaker. Idangjibo, asenoka Assam police-i memeintsü aser khua tebennütsü abentsü. Ibaji asenok ajaki angateta aliyong, iba tenemtsüng lenmang ya renemer yangji jajatsü yongyar. Ajisüaka, Foothill lenmang yagibo asenoki bilema yongyaba dang nungi tajangzük tuluba, teimba aser tajungba agütsütsü bilema lir, kechiyong iba lenmang yabo nisung jajatsüba kisüng masü saka iba lenmang yagibo asenok nem mapa agütsütsü aser sen aatsü lenmang aika lapoktsütsü. Ibaji kodang asenok nükla nung ataloka ngudir asenoki foothill lenmang ya tangsa renemjang ta kinü tanuri tetsü mama meshia ajepba ama jepa ayimtentsü. Tangbo asenoki lenmang yanglutur ayuyonga kecha balaka jashia mebilemer, kechiyong asenoki iba lenmang yanglur külen iba lenmang ajanga angutsüba tajangzük aser temoatsüji asen nükla nung yimdangi arua mangur. Ibaji asenok dang architect engineer-i ki design yanglur sayuaka kiji komaka yanglutsüar asenoki mereprangtetba amai lir, kechiyong mangdang aser nükla yabo asenok tenük ana yagi masü temulungjang tenük agidang angur. Aji oda, asen mangdang aser nükla nung asenok meyong Foothill lenmang songjen ya Economic Zone ka kümer asenoki züsentetba aonsutsü aser süngjanglijang tapu balala lenmang piyong ayoktsü, iba lenmang lenjem shia nung chiyongdak aser süngojem dak lapoka alitsü, ano tesem tesadem nungbo dokan tajunga lapoktsü, gari totzü ayokdak aser electric gari charge asüdak station lapoktsü ta asüba tebilembatem mapa kümer angutsüla. Aji oda, Mon, Longleng, Mokokchung , Wokha, Dimapur, Niuland aser Peren district-tem tsüngda anogo shia nisungtem oli aruli jajaba purtemji Foothill Road nung kechisarina ayokertem meyong customers akümtsü. Idangjibo, Naga nunger sen Naga nunger keti aotsü aser Assam nung Silonijan amabo mali amai kümadoktsü. Iba amaji kodang Foothill lenmang ya renemtetdir, idangjibo asen lu nung züsentetba chiyongtsü aser asen kidang metsütetba shirurutem dang masü saka arem nung süngolio ajak, amchi am dena agi sen akümtsü. Aji oda, kodang asen yimtak aser asen lu nung züsentetbatem ayok tenzükdir, idangjibo government-i meyanglutetyonga asenok dang alir company-temi asen alu lenmang dena yanglutsütsü aser item lenmang ajakji aluagi Foothill road nung jiloktsü. Atangji, shitakba agibo, ibai asen state government-i Nagaland nung Assam den artsüsa aliba lenden limatem ajunga ya Special Economic Zone  (SEZ) kümdaktsür tenemtsüng lenmang nung gari ananabo kenyongi tsüiteptettsüsa yanglur alitsüba mapang ka lir. Aji oda, tangalen asünungbo governmenti lenmang yanglutsüba denji nübortem anisüngzüka amendak aser chiyongdak lapoktsü atema kiojen dena yanglutsür item mapa inyaktsü jangrar lanurtem nem agütsür lila. Aji oda, tenemtsüng lenmang ama yangluba yagi nisung amenba aser khu abenba garitem jajatsü lapokba den külemi nübortem asoshi mapa, jobs, zünger mezüngma adokdaktsütsü. Idangjibo, tazünger-a mazünger-a mapa manguba tebilemtsü malitsü.  Item temoatsü aser tajangzüktemji magishi talangka asensasa asen timtema malitsüsa, asenokbo government den yaritepa tang yanglutur aliba foothill lenmang ya tama renemtsü asoshi lenmang bushitepdi.