Kechiba mapai marur ?

Nagaland nung tematiba office Civil Secretariat nungi shir district shia sub-division office tashi nung government tenzükertem mapai maruba indang jembiba angashir. Shitakba agibo government office nung mapa inyakertem mapai maruba indang jembitsüba masü saka mapa inyaker meinyakmaba agi anogo shia mapang talila agia inyakba indang jembitsüla. Atangji, nisung kar mapai mouka karbo anogo shia mapa inyaker meinyakma inyaka alitsü. Ajisüaka, nisung kar mapa talila inyaker aser karbo kenüa mapai mao ita sen angati chia kazür ta asüba sobaliba ali tashi asen lima merenloktsü. Aji oda, tanü Nagaland timtemba tebilemtsütem rongnung government tenzükertem mapai maoba tebilemtsü ya ka süra senso ajaki kechiba parnokji mapai marur ta bushisüngdangtsübaji kanga nüngdaker. Ashiko, mapa inyakertem mapai maobaji azümesena mounüba kija agibo masütsüa akok, mesüra mapa maliba kija agia masütsüa akok. Item kulitemji metettsü atema department shia nung  tekolak aser district shia nung Deputy Commissioner-temi mapai marurtem dang asüngdangtsü tim. Ashiko, karbo shitakba alima nung mali ser nung ita sen agizüka achitsü asoshi shimba temenen tanülatema alitsüa akok. Itemjibo kodanga marutsü . Ano, karbo tashiyim agi sarusachi sarur onsara nungji itemji tsübuba agi mapai mao kidang nungi inyaker asütsüa akok. Ano, karbo pei kinunger adianu temedanger tulur takar aliba agi parnok dak jenoka yur mapai mao ita sen agia kazür asütsüa akok. Ano, karbo mapa inyak mashi memetetba agi nübortem dang jenshia mapai maor asütsüa akok. Ano, karbo office ana asem nung inyaka alitsüa akok. Ano, karbo pei office mapa dang nungi pei jurila business mapa-ang tuluba inyakba agi nübortem tenzüktsü mapang magütsütetter asütsüa akok. Ano karbo office nung teinyaktsü mapa kecha makaba agi maor asütsüa akok. Ano, government mapa inyakertem karbo mapa inyakdak office-a maka aser mendena makaba agi maor asütsüa akok. Nagaland nungbo item ajakji takoktsü. Ano, item dakji alaka mapabo tera dang saka inyakerbo aika shimba agi kati ka dak imlatepa mapai maor asütsüa akok. Iba amaji Nagaland nung nübortem asoshi tezüdangtsü tulutibaji sorkar office nung tulubai anir mapa inyakertem mapai maruba yimya ya asütsü. Yimtaklirtem anasai oa tesem tesem nung sub-division lapokbaji yimtaklirtem nübo aser rongsen endoka mesenzüdaktsüi parnok tonga oagi parnok nüngdak inyaktsütsü nükjidong nung lapokba lir. Ajisüaka, kechi kuli agi südir süang, iba sub-division nung inyakertemji mapai moura sub-division office lapokba tajangzükji kechi asütsü ? Iba kasaji district headquaters nung lapokba office-tem aser Kohima nung lapokba department-tem nükjidongji lir. Senso tajung ka pa mesüra la nüngdak asoshi Sub-Division Office bushia aotsü saka yangji inyaker majurutsü, anungji district office bushia aotsü saka yangjia inyaker majurutsü, anungji tesüsa Kohima-i arutsü aser yangjia inyakertem majuru hopta junga amongtsü ta timtem agütsürtemji government tenzüker saka mapai maortem lir. Sorkar office lapokba ya sorkar mapa nung nisung ishika ita sen chia alitsü atema lapokba masü saka nübortem nüngdak inyaktsütsü asoshi lapok ta government nung alir aser tenzükertemi angatettsüla. Joko, Nagaland yanglushidi süra sub-division nungi shir district aser state capital ajak nung office kiojen shitak yur mapa shitak inyak tenzüktsüla. Office shia nung tekolak purtemi pei office kilong dang masü saka kima dena office-ji office ama meraketa ayutsüla. Aji oda, government nung alirtemi kecha office nunga mapa makaba agi office-i maor, nisung tamajunger tsübuba agi office-i maor mesüra kinunger tajung aliba aküm nung office-i maor ta mesüdaktsütsüla. Office melapokba aser office nung inyaker mapai maobaji government mali den kasa lir. Aji oda, government office melapokba aser inyakertem mapai maoba dena nübortem nem bushidaktsütsüsa masü saka kibur (government)-i aji bushitsüla. Ajisüaka, lanur aser kaketshirtemi government mapa inyakertem mapai arutsüla ta takangba agütsütsüsa aliba tensa tiaji Nagaland nungbo yimten maliang mesük ! Ibaji nübortem asoshi shisabolutsüka lir.