Kechiba Mehbooba-i J&K Chief Minister meinyaknür?

Muslim tsürtem rongnung mezüngbuba Chief Minister ji Jammu & Kashmir nungi People’s Democratic Party (PDP) lennir Mehbooba Mufti asütsü akok, saka hopta asem süiaka lai telemtetba kecha magii dang arur. January 7, 2016 nü Mehbooba tebu aser J&K nung taoba Chief Minister Mufti Mohammad Sayeed asü aser iba sülen PDP-ibo parnok lennir Mehbooba nem tebui toktsüba menden nung amentsü mulunga lir ta metetdaktsüogo saka tanü tashi lai J&K nung chief minister inyaktsü atema telemtetba magi aser tebu asüba sülen Bharatiya Janata Party (BJP)-ia Mehbooba indang taginüba aser telemtetba kanga metetnür. Asür Sayeed-i Jammu & Kashmir nung BJP den teloktep sorkar ketdangsüa aru aser iba teloktep ya kanga dang bilemdanga jembishinüba sülen ang kümtetba liasü. 2014 state assembly elections mapang BJP-i Jammu nung Hindu nunger timba ser aliba tesem nungi menden 25 nung takok angu aser Sayeed’er People’s Democratic Party (PDP)-i Muslim nunger timba ser aliba Kashmir nungi menden 28 nung takok angu. Taoba Deobarnü Mehbooba-i tebu asüba sülen mezüngbuba PDP senden ayongzüka agi aser iba nung sorkar kümtettsü atema onük benoka olemtep. Iba senden agiba sülen Mehbooba den yariteper tongti Naeem Akhtar-i osangbener dang, “onoki sorkar tentettsü atema telatetba kecha mali saka BJP-i asür Mufti den pa Chief Minister makümdang Agenda of Alliance yangluba ama mapa küma inyakdaktsünür,” ta ashi. PDP-i Mehbooba Mufti nem BJP den maneni teloktep sorkar tentettsü mesüra iba teloktep malitsü telemtetba agitsü atema tashi bendanga agütsüogo.  Ajisüaka, Mehbooba-i kanga karabo telemtetba magitsü amai ajiteter anungji Jammu & Kashmir nung sorkar tasen tentettsü atema mapang agitsü. Tebu ama masü Mehbooba-ibo la tenüng, party tangatetba aser PDP indang tarutsü atema bilema inyaknür ta osang angazüker.  Lai sorkar tentetra, PDP-i BJP den tesentaktep tanabenbuba atema yanglur asütsü. Asür Mufti-i, “PDP aser BJP longjembaji North Pole den South Pole na ajurutepba ama lir” ta atishia jembiogo. Yaküm PDP-i BJP den tesentaktep yanglubaji PDP pusema vote agütsür aikati magizük aser ibaji asür Mufti den asüpila sentong aser pa asüba sülen tetushi agütsüba sentongtem nung kuli nguogo, kechiyong item sentong nung nisung imlaba ama mesentep. Ano külen, osang angazükba agi Mehbooba-i Prime Minister Modi dang mepelar, kechiyong tebu Delhi nung AIIMS hospital nung shiranga anepaludang Modi-i khen danga mesemdang aser ano tebu den asüpila sentong nunga pa maden. Iba asoshi nisungtemi NDA sorkar mezüng kümsük nung taoba PM Vajpayee aser PM Modi na medemdanga jembir, kechiyong iba mapang Farooq Abdullah tetsü Begum Akbar Jahan asüdang Vajpayee aser Deputy Prime Minister LK Advani nati Srinagar nung la den asüpila sentong nung aden. Ajisüaka, tang Mehbooba-i BJP den tesentaktep raksara, lai aniba telok dak tangari temulung malemtsü, kechiyong 2008 nunga lai Congress den tesentaktep raksa aser ibaji ajanga Jammu & Kashmir nung Ghulam Nabi Azad-i aniba sorkar chireptsüsa aküm. PDP aser BJP tsüngda Agenda of Alliance tenangzüktep agia alibaji Mehbooba-i mapa küma inyakdaktsünür, aser külen BJP-ia iba tenangzüktep nung aliba onüktem – J&K nem special status, Article 370, Pakistan aser telungpurtem den olemtep nunger süoki ia agizüker ta ashir. Ajisüaka, Mufti asütsü anogo ishika tejaklen BJP lennir kati okadaki tetuyuba agütsüba anema ken o benok. Jammu & Kashmir nung parnok state indang wako balaka amshitsü temelaba agüja lir aser iba nungji ajemdaker J&K nung sorkar kiojen aser garitem ajak nung Linük wako aser state wako naprongla külemi enoker aser ibaji pusema High Court-ia oshidang ka agüja liasü, saka J&K nung BJP züngsem kari Linük wako dak alaka state wako mamshir aser iba asoshi PDP züngsem kari mepelar.  Iba wako onük ya Mufti asüba sülen balaka raloka oa mejembi saka Mehbooba-i iba asoshi mepelar ta osang angazüker. Pa den yariteper kari ashiba agi iba ya ajanga BJP-i temeli ana keter jembia inyaksangshiba kuli agütsür. Parnoki state temzüng kübok anidaker tabo tenangzükba agir saka ano parnoki temzüng nung shilem kar anema noktaker, ta PDP lennir kari ashi. Ano külen, RSS kübok telok kari Article 370 anema ola adoker. Article 370 ajanga Jammu & Kashmir nem special status agütsür saka ibaji anema RSS-i aniba telok kari ola adoker aser ibaji atema PDP züngsem aser J&K nung alirtem mepelar. Iba ama tensa ka nung asür Mufti’er jala Mehbooba-i Jammu & Kashmir nung Chief Minister inyaktsü jangraa aliyonga, kanga kararabosa telemtetba magitsü amai ajiteter, kechiyong iba telemtetbaji ajanga lai la aser lar telok tarutsü len lapoktsü mesüra shibangtsüsa akümtsü.