Kechiba Modi-i kodanga nashi shi indang mejembir: Manmohan

New Delhi, Feb. 12 (Agencies): Taoba UPA sorkar nung Ato kilonser, Manmohan Singh-i pa office toktsüba mapang nungi osangbenertem den kangabo mejembir mesüra tan sorkar inyakyim indang mejembir, ajisüaka tawa pai Ato kilonser Narendra Modi-i linük dang nangzüka alibatem meinyakba atema aija jembiogo.
India Today-i interview agiba mapang Singh-i, Ato kilonser Modi-i rongsenkettsüng ainba nung terenlok aliba indang jembir, ajisüaka UPA sorkari toktsüba jenjang den tepila kecha mali, ta ashi.
“Yaküm growth rate ji shilem 6.9 liasü, tang tesüsabuba rate ji shilem 7 nungi 7.2 tsüngda lir. Anungji, balance of payments nung temelenshi liaka, rongsenkettsüngji tejakleni maor, aser iba atema sorkari nangzüka liasü,” ta Singh-i ashi.
Modi-i nashi shi, Muzaffarnagar ama mangatettep aliba onük nung ola madoker ta aija Singh-i, “Pai kodanga jembia mali; nashishi tebilemtsü mesüra Muzaffarnagar densema tanga tesemtem nung atalokba indang mejembir, pai ola madoker,” ta ashi.
Modi-i ajungbena Lahore (Pakistan) semdangba dak sentakba nung Singh-i, “Kidanger den tongtepratep alibaji junger, ajisüaka ibaji ajanga o tulu jembitsüji nüngdak madoker. Nai mera agia inyakba ajanga tajangzükji nai mejangjara, na amajok nung nü tashi endoker. Anungji Ato kilonseri kanga junga meshisangdang ta ni bilemer. Nawaz Sharif den jembiba mapang pa Kabul nung liasü, pai pa (Modi) jaoka liasü. Ajisüaka India aser Pakistan ama kanga ‘sensitive’ tesentaktep ka nungbo, iba asameyangji mapet,” ta ashi.
Paisa, GST Bill densema tanga bill tem agizüktettsü atema Ato kilonser Modi-i Congress bangdak lenirtem, talisa Sonia aser Rahul Gandhi na den jembitsüla, ta ashi.
“Pa den senden ka amenba mapang ni pa dang, nai atangji Congress party den tesentaktep jungnüra, taoba mapang dang nungi tang taliba Congress lenirtem, talisa Sonia aser Rahul Gandhi na den tesentaktep ajungtsüla ta shiogo. Foreign policy mesüra linük policy aser GST nunga (parnoki) Congress den süoki ia o lemtepba mali,” ta Manmohan-isa ashi.

You must be logged in to post a comment Login