Kechiba Naga nungeribo saisapong nung tangar ama masayateter ?

~ L.Kika Pongener. Aoyimküm, Dimapur.

Mapang ka nungbo India lima ajunga nungi Olympic Games nung Football team asen Aoer senso tajung Dr.T. Ao captain ser anir oa asayaba tanü tashi tar nunger otsü ama jembir,anungji item semchirtemji tanübo state, national aser international level nung nüngtugu asayar aika adoker alitsüla. Ajisüaka North East level nung asayar-a sünga ka danga malitsüsa ya kechi tai ? Sorkar tai asü ? Lanurtem asayatsü purtem tai ? Taoba küm nungi Hero India Football Super League tenzüker India nunger Football asayaba nung asentenshi tuluka adoka küm ka tsüngda nung danga terenlok kanga lia asayaba kuli tejangja ngudagi aser ano taküma tan October ita nungi tenzüka asayaba aonung shia TV nung jangratema reprangtepdagi. India nungeri Crikete asaya aser Hockey asaya reprangba dak alaka Football asaya yabo sapua mereprangi liasüba, iba Hero India Football Super League tenzüker külen nungi Football asaya sapua repranger aika renlokogo. Asenoki alima rangben tashiji asadanga mouaka asen India lima nung danga Cricket asayar-tem Tendulkar aser Mahindra Singh Dhoni nunger ya reprangdangra education degree-a tangar dang nungi talila balaka-bo mezüngi alitsü südi, ajisüaka asaya ka nung nungtugu süa asayatet nung alima nung alir ajungai meteta akümba den külemi crorepati & billioneer tashi akümba ya shisadangang, aser ano India sorkari Air Force aser Army nung rank tulu mapa dena agütsür alima nung tasoa shizüka jangratema aliba ya koda ? Manipuri tsür Mary Kom boxing kanga junga asayatetba ajanga India nunger ajunga nem konang bentsür aruba dang masü,saka la kanga dang sensakpu tepetzük kibong ka nungi intetba taküm ka aser education-a kangara tulu azüngba ka masü, saka tanübo la kijai boxing training institute tashi lapoktettsüsa la ket nung rongsen aser tashi alitsüsa jenjang ka kümadokogo, aser la nema Manipuri sorkari police department nung Deputy Superintendent of Police jenjang tashi nung mapa agütsür jangratema alir. Sürabangla asen Naga nungeria iba amai asayatsü kokteta dang lir masü no ? Tang asayaba Hero India Football Super League nung North east state-tem Assam, Manipur, Mizoram aser Meghalaya nungi lanur asayar club aika nung dener asayadagi, aser tongtipangsa North East United team nung item North East state-tem nungi asayar tajung dena lir. Aser ano Shillong Lajong Club, iba club yabo India nung akhidang nungi aliba tejen club Mohan Bagan , East Bengal & Mohanmedden item dena toktepa asayatetba ya tangar masü asenok North East nungi asayartem teimba lir. Taoba mapang ISFL atema Players auction asüdang tu North-east nungi Manipuri, Khasi aser Mizo nunger asayar tajungtembo sen lakh aika agi alizükba asenoki nguogo. Ajisüaka asen Naga nungerbo tang tashi nung yamala nungtugu asayar ka danga madoktsüsa ya kechi tai (?) ta aiben shisadanger. Tanü putu nung zünger sorkar mapai aitsüba dak kija metaloker alinung koda asütsü ? Tangarbo sorkar dak memetaloki Games and Sports & Atteletic nung mongin süa asayatetba ajanga sen lakh aika aahzüka pei taküm kibong mesüa alir.
Aji oda, asen sorkaria tongtipang teinyaktsü mapa kar meinyaki senzüka tokja lir ta asenoki angatetter.Tanü tashi asen Naga lima nung Kohima jila nung Indira Gandhi stadium ka akaba dak alaka Stadium kata mali, saka asen kidanger asen dang nungi tesü state anguba Manipur lima nungbo National Games dena host sütettsüsa stadium peria dang yanglua lir. Aji oda, asayar tajung adoktsüsa lanur tejangrar liaka asayadak moapu tesadem teperi makara kong kodaser training agia asayar tajung adoktsü ? Aji tamakoktsü. Anungji sorkari küm shia saisapong renloktsü asoshi sentong tajung yanglua saisapong nüngdem nung senotsü indoktsü mesasatsüla.
Anungji sorkari tang nungi danga temulong agüja district shia stadium kakabosa yanglutsü sentong ayutsüla. Educated un-employed youth atema mapa agütsütettsüsa department tasen mesüra factory & industry tasen lapoka aotsü asoshibo mapang aser rongsen jenti nüngdaker,saka saisapong atema moapu tajung kar yanglutetra iba jagi lanurtem educated un-employed asoshi tajangzük tulu asütsü. Anungji lanur zünger mapa mangurtem atema melamelaa mapa inyaka pei taküm kibong mesüa litettsüba lenmang tajungtibaji saisapong nung mongin küma asayatetba ya-a ka asütsü. Aji oda, lanurtemi-a saisapong nung temulong agüja nendaka asayatsü angazüktsüla. Lanur asayartemi metettsüba tongtipang kaji asayar kati asaya tapu ajak nung ayimdaker masayatsüla, saka asaya tapu ka nung dang mongin süa asayatsü merangtsüla.Tanabuba nung, asayar kati moko-sali machitsüla aser yi majemtsüla. Asayar ka moko-sali chia yi jemra pa/lai kodanga tangar menepa masayatettsü mesüra tangar ama tashi (Stamina) tatem tashi agüja masayatettsü. Asayar ka junga asayateta tangari meteta international aser national level tashi nung asayateta kümra pa/laji tangar dak memetaloki tepok sünga chiyunga jema takar küma alitsü, pa/laji alimai meteta nüngtugu nisung akümtsü aser asen lima asoshia konang nüngsang bentsür arutsütsü. Anungji zünger sorkar mapai aitsü dang mebushii tangar ama asaya nung temulong agüja asaya-a asayar mongin kümer, iba jagi tebok mesüa takar küma alitsü merangtsüla ta asen Naga nunger lanurtem ajak tang iba ocet ajanga ajungshir.