Kechiba PM amenba chopper mita mereprangdaktsür: Congress

New Delhi, April 18 (Agencies): Odisha nung Ato kilonser, Narendra Modi amenba tayimtsü mita reprangba atema election ketdangser ka mapa nungi anentsüba aija tanü Congress-i Election Commission dang, Ato kilonser garitema mita reprangtsüla, ta ashi.
EC-i Karnataka cadre IAS officer, Mohammed Mohsin-i mapa nung tamakok aludaktsü, ta shia mapa nungi anentsü, aser iba dak sendakba nung Congress-i, Modi amenba helicopter nung nüburtem nem memetetdaktsütsüsa pai kechi bena liasü?, ta asüngdang.
Congress-i twitter ajanga, “Ketdangser kati garitem mita reprangba atema EC pa mapa nungi anentsü. Nüboyimba mapang Ato kilonser indang garitema mita reprangtsü ozüng nung lir,” ta metetdaktsü.
“Tamalen Modi indang helicopter nung bakos (box) ka agizükba sülenbo EC-i tayimtsü ajak mita reprangtsü ta imlaa liasü,” ta Congress-isa ashi.
Osang angazükba agi IAS officer Mohsin-i SPG protectees dak sendakba nung EC tetuyuba ama meinyakba atema pa mapa anungi anentsü. April 16 nü SPG-protectee Ato kilonser Modi-i election nüboyim atema Odisha nung Sambalpur semdanga liasü.
Congress lenir, Ahmed Patel-i twitter ajanga, “Taoba mapang election mapang nung taoba aser tang teinyakdak Congress Tir convoys mita reprangtsü atema EC nem temelaba agütsü. Ato kilonser indang helicopter mita reprangba atema kechiba ketdangser ka anentsür? Iba ya ajanga kechi temaitsü sayur? Ozüng ya kar atema dang asü?” ta asüngdang.