Kechiba PM-i Naga Accord yimjak nung metetdaktsür: Yechury

New Delhi, March 29 (Agencies): Küm ana tejakdang agiba tezüngzüktep, Naga Peace Accord Centre-i ajunga mesangdongba atema tanü Bodhbarnü CPI(M)-i Centre dang tasüngdangba kaogo.
NSCN(IM) lenir, Thuingaleng Muivah-i Centre den teloki tezüngzüktep agiba nung Centre-i Naga nunger litsü ajak ulushitsü atema nangzüka lir ta jembiba osang tetshia CPI(M) general secretary, Sitaram Yechury-i, ochi jungkai adoktsü atema kechiba Ato kilonser, Narendra Modi-i iba tezüngzüktep indang ajak mesangdonger, ta asüngdang.
“Muivah-i ashiba agi, Modi-i pa den sign asüba framework agreement nung Naga nunger litsü ajak ulushitsü nangzüka lir. Kechiba küm ana tashi iba tezüngzüktep nung alibatem mesangdonger? Ochi metettsü atema kechiba Ato kilonseri tezüluba ajakji mesangdonger?” ta Yechury-i twitter ajanga asüngdang.
Tan hopta tetenzüklen Muivah-i, ‘Greater Nagalim’ nungji Assam, Manipur aser Arunachal Pradesh nung Naga nunger aliba ajak adentsü ta jembia lir.
Ajisüaka Centre sorkaribo Nagaland state tuluba akümtsü atema parnoki mulungogo ta asüba osangtemji tai, ta ashir.
Mongolbarnü Home Ministry nung otongdar kati, “Item osangji tai. India sorkari iba atema tezüngzüktep magi mesüra telemtetba magi ta jangjashitsüogo,” ta ashi.