Kechiba PM Modi-i Panama onük nung ola madoker: Rahul

Kamalpur (Assam), April 08 (Agencies): Hokolbarnü Congress tatong Tir, Rahul Gandhi-i, Ato kilonser, Narendra Modi-i bendanglen nungi ochimashiba sen meyipa bener arutsü nangzük saka pai nangzükba ama meinyak, ta aitsüba den külemi, Panama Papers nung Chhattisgarh chief minister’er jabaso tenüng densema aliba bushisüngdangtsü atema kechiba pai (Modi)-i kecha meinyaker, ta asüngdang.
April 11 nü Assam assembly election agitsü lia Assam, Kamalpur nung Congress nüboyim senden nung jembidang Rahul-i, “Panama Papers osang prokshiogo aser Panama nung ochimashi sen rizüngba tenüng aika sangdongogo. Chhattisgarh chief minister’er jabaso Abhishek Singh-a Panama nung account aliba shia lir,” ta metetdaktsü.
Paisa, “Bendanglen ochimashi sen rizünga aliba meyipa bener arutsü atema Modi-i nenok dang nangzükogo.Item nungji chief minister’er jabaso tenüng aliba atema bushisüngdangtsü asoshi kechiba meinyaker’ar pai (Modi) ashitsüla,” ta ashi.
Rahul-i ashiba agi, Parliament nung pai Modi dang kechiba taoba mapang IPL tongti, Lalit Modi linüki anir marur ta asüngdangogo. “Modi-i telangzüba agüja ola kata madok,” ta paisa ashi.
Sorkar aitsüba olen ka nung pai, “Mallya (Vijay)-i linük toktsür majendang pai Parliament House nung Finance Minister Arun Jaitley ajuruogo. Sen crore merirjang aika auyasang, Lalit Modi-a linük adener tanga len lidaktsür,” ta ashi.
Modi’er sorkari ochimashi sen rizüngertem, anema kecha meinyaker ta aija Gandhi-i, “Auertem, nisung tamajungertem aser mozü shishilembartemi sorkar den dang jembia iba atemaji saru tera dang agütsüra ‘black money’ agi temesüng akumtsü atema tawa Jaitley (Union finance minister)-i ‘Fair and Lovely scheme’ tasen ka aliogo,” ta ashi.