Kechiba Rahul-i PM indang osang jungkai madoktsür: Arvind Kejriwal

New Delhi, December 14 (Agencies): Congress lenir Rahul Gandhi-i Ato kilonser, Narendra Modi-i ochimashiba osang meteta lira kechiba pai iba osangji jungkai madoktsür, ta shia tanü Delhi Chief Minister, Arvind Kejriwal-i, Congress aser BJP na kati ka aitsüteper saka jungkai adoka memetetdaktsür, ta party anaprong aitsü.
“Modi-i pa nija ochimashi indang kuli Rahul Gandhi ket nung lira, kechiba pai ibaji Parliament kima jungkai madoktsür?” ta Aam Aadmi Party tongti lenir, Kejriwal-i asüngdang.
“BJP-i, Congress anema parnok ket nung AgustaWestland kuli lir ta jembir. Ano Congress-ia BJP anema parnok ket nung Sahara/Birla ken o kuli lir ta jembir. Ajisüaka anapronglai jungkai madoktsür,” ta Kejriwal-i twitter ajanga ashi.
Tanü Rahul-i, pai Lok Sabha nung Modi-i ochimashiba indang jungkai adoktsüner, saka Ato kilonseri ibaji (Parliament nung jembitsü) memelar, ta jembiba o dak sentakba nung Kejriwal-i item o jembiogo.
Sen tamshidak onük nung Kejriwal-i, shishilembartemi BJP dang jashir, ta ashi. “Linük nung shishilembartemi yamai ashir, BJP-i onok dang nungi sen agir, onok dang nungi vote agir aser onoki dang auertem ta ajar. Chichiba auertemji Ato kilonser den külemi langbang nung chiyunger,” ta AAP lenirisa ashi.
Ano AAP lenir Ashish Khetan-ia twitter ajanga, “House telung nung jembitsü memelara Rahul Gandhi-i kima jembitsüla aser Modi indang osangji jungkai adoktsütsüla,” ta ashi.