Kechiba UP nung Rahul shilem agidaktsür: BJP

New Delhi, February 25 (Agencies): Yashi Congress lenir aser taoba mapang Delhi CM, Sheila Dikshit-i Rahul Gandhi ano shisatsü junga main, ta jembiba o nungi maongka agir tanü BJP-i Congress dang, kechiba party-i Rahul rongshia Uttar Pradesh nung shilem agidaktsür, ta asüngdang.
Dikshit-i jembiba o nungi maongka agia BJP lenir tain, Harikesh Bahadur-i, Rahul temaba jenjangi tudaktsütsü renema ali asü maliar party-i o tokteptsüla, ta ashi.
Paisa, “Sheila ama lenir tain kati jembiba oji atangji teshisadangtsü lir,” ta ashi.
Ano BJP Tir, Amit Shah-ia, “Sheila, nai Rahul ano shisatsü main ta jembibaji linük ajaki meteta lir, ajisüaka kechiba nai pa nem Uttar Pradesh nung shilem agidaktsür”?” ta asüngdang.
Ano külen Congress otongdar, Shobha Oza-ibo, “Item ama oji sendoktsüla. Lai (Dikshit) jembiba oji lai jangjashitsütsü nüngdak. Linük dak sendakba nung, Rahul Gandhi-i land acquisition bill nung aluyimertem atema raratsü, aser aluyimer anemba telemtetbatem agientsü atema pai sorkar den jembi. Pai SCs, STs, aluyimyertem aser sensakertem temeten atema jembir,” ta ashi.